Фариза Оңғарсынова Астанадағы Ұлттық пантеонға жерленді
Алаш жұрты қазақтың біртуар қызы, ақын, Қазақстанның халық жазушысы Фариза Оңғарсынованы ақтық сапарға шығарып салды. Қаралы жиынға келген жұрттың қарасы қалың. Қоғам қайраткерінің 75 жасқа қараған шағында күтпеген жерден дүние салуы елді есеңгіретіп кетті. Бірақ ақынның артында өшпес мұра болып талай ұрпақ жатқа айтар жырлары қалды.
Автор: Гүлнұр Имандос
27.01.2014
Бүгін тұтас ел күңіренді. Мәрт мінезді, арқалы ақынын бүкіл халқы жоқтады. Жұрт қоштасу рәсімі өткен ғимарат ішіне сыймай кетті. Министр, әкімдерден бастап, қарапайым оқырманына дейін бүгін осында. Өйткені, поэзия падишасы Фариза Оңғарсынова көзі тірісінде олардың біріне әріптес, шыншыл дос, ал екіншісіне жанашыр ана ретінде қымбат еді.
Иманғали Тасмағамбетов, Астана қаласының әкімі:
-Фариза апамыздың жанына жақын інісі ретінде ол кісінің шапағатына ерекше бөлендім, мейірімін көп көрдім. Сондықтан да Фариза Оңғарсынқызының адамды тани білетін ерекше бір қасиетін айтқым келеді. Ол – ана абзалдығымен, ерекше өзіне ғана тән абыздығы.
Осы бір жарқын бейне. Жаратылысы бөлек қайталанбас тұлға. Көзі тірісінде-ақ аты аңызға айналып қошеметке бөленді. Алайда ақын атаққа, дүниеге ешқашан қызыққан жоқ. Ауыр сырқатқа шалдықса да жанын өршіл өлеңдерімен емдеді. Ажалмен де, соңына дейін арпалысты.
Ақұштап Бақтыгереева, ақын:
–Мен өз басым Фаризаны Астанада тұрақтап қалған, оның өлеңдерімен қайта жас ұрпақ кездесіп тұратын үлкен сапарда жүр деп қана ойлаймын. Фариза жоқ дегенге сенгім келмейді.
Сенгің келмейді, бірақ амал нешік. Халқының біртуар қызы мәңгілік сапарға аттанып кете барды. Фариза ақын Астанадан жаңадан ашылған Ұлттық пантеонға жерленді. Ақынның жырлары да құлыптасқа ойып жазылған аты іспеттес, жұртының жүрегінен мәңгі өшпейтіні анық.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
