Шөлмектен жасалған ерекше жылыжай жұртты таңғалдырды
Солтүстік Қазақстан облысында ерекше жылыжай бар. Жасыл желегі жайқалып тұрған нысанды Новоишимка ауылының тұрғындары кәдімгі шөлмектерден жасаған. Енді балалары қыс бойы осы жылыжайдың қызығын көріп, жаңа піскен қияр мен қызанақ жеп жатыр. Ғимаратқа қажетті 140 мың шыны ыдысты ауылдықтар ел болып екі жыл жинапты.
Автор: Гүлмира Тасболатқызы
28.01.2014
Ұзындығы 25, ені 16 метрдей болатын бұл жылыжайдың сырт қарағанда өзге ғимараттардан еш айырмашылығы жоқ. Оның бөтелкелерден салынғанын тек ыдыстың жылтырап тұрғын табандарынан байқауға болады.
Мағзұм Дүйселеков, Нежинка ауылдық округінің әкімі:
-Екі шыны бір біріне қойғанда 52 см, раствор, цемент, құм деген сияқты. Былай айтқанда арзан, жылу ұстап тұрады. Төбесі поликарбонат, жылу беріп тұрады.
Қазір мұнда жылыжайға лайықталған қияр, қызанақ пен аскөк өсіріледі. Жылына екі рет 600 келіге дейін өнім жиналады екен.
Татьяна Савенкова, жылыжай қызметкері:
-Жылыжайға өзіміздің шаруашылықтан таза көң пен таза топырақ әкелінеді. Ешқандай гербицид сеппейміз. Өзіміздің балалар жейді ғой. Артығын дүкенге қойып, арзан бағамен сатамыз. Түскен пайдаға отын сатып аламыз.
-Бұл жылыжайды салуға 140 мың бөтелке жұмсалыпты. Шыныларды ауылдықтар ел болып екі жыл жинаған. Мұндай ғимараттың жобасын серіктестік басшысы ғаламтордан көрген екен.
Бөтелке жинауға тіпті мектеп оқушылары да атсалысыпты. Шаруашылық басшысы оларды ынталандыру үшін арнайы сайыс та ұйымдастырған. Екі жыл ересектермен бірге бөтелке жинаған балалар енді қыс бойы мектеп асханасында дәруменге толы тамақ жеуде. Ал ауылдықтар аумағы бұдан да үлкен екінші жылыжай салу үшін тағы да бөтелке жинауға кірісті.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
