Алматы маңында құлаған CRJ-200 ұшағында ешқандай ақау болмаған
Бүгін апатқа тура бір жыл өткенде комиссия тексерудің осындай алғашқы қорытындысын жария етті. Дегенмен оның нақты себебін сол күйі анықтай алар емес. Естеріңізге салсақ, «Скат» компаниясына тиесілі CRJ-200 ұшағы қалың тұманда қона алмай, Қызылту ауылы маңында апатқа ұшыраған еді. Бортындағы 21 адамның ешқайсысы тірі қалған жоқ.
Автор: Нартай Аралбайұлы
29.01.2014
-Қыстыгүні қаңтарда қаннен қаперсіз жатқан алып алқап бұл, құлаққа ұрған танадай тыныштықты тек төбеңнен сәт сайын ұшып өтетін ұшақтар бұзады. Біз табан тіреген бұл маңнан қозыкөш жерде Алматы қаласының Халықаралық әуежайы орналасқан. Бүгінгі бейқам тірлікті осыдан тура бір жыл бұрынғы уақытпен салыстыру мүмкін емес. 2013 жылдың 29 қаңтары, дәл осы алқапқа CRJ-200 ұшағы құлдилап келіп құлаған еді.
Бір жыл бұрынғы апаттың табы әлі бар мұнда, талқан болған темір-терсек таудай боп үйіліп жатпаса да 21 адамның өмірін жалмаған суық мекенді марқұмдардың туыстары саусақпен нұқып көрсетеді. Тура бір жыл өтсе де кеуделеріндегі шерлері тарқамаған ел апат орнындағы ескерткішке гүл шоқтарын әкелуде. Әуе кемесі құлаған күні тәулік бойы марқұмдардың туыстарына көмек көрсеткен психолог мамандар да қатты қажығандарын айтады. Бауырларынан айрылып көз жастары көл болған ел алғашында ешкімге құлақ та аспаған.
Динара Салықова, Алматы қаласы ТЖД психологиялық қызмет бөлімінің бас маманы:
-Ұрыс-төбелеске дейін барғандар болған жоқ, бірақ ашу-ызасын көрсеткендерде болды. Біз барынша оларға көмектестік. Ол түсінікті жағдай.Ашу-ызаның барлығы кеңсе қызметкерлеріне бағытталды. Сол кезде біз оларға да көмек көрсеттік.
Апаттың салдары айқын, бірақ себебі көмескі әлі. Қара жәшік те оқылды, тергеу жұмыстары да аяқталып келді. Алайда CRJ-200 неге құлады деген сұрақ жауапсыз. Көк жүзінде 25 мың сағат ұшқан, 40 жылдық өтілі бар ұшқыш өз жормалдарын айтты.
Мақаш Әбішев, ардагер ұшқыш:
-Апаттың екі себебі болуы мүмкін, бірі ұшаққа қатқан мұзды ерітетін құрылғылардың істен шығуы, екіншісі аталмыш аппараттардың қызметін толық атқармауы. Бір жыл өтсе де апат себебін айтпауы Көлік және коммуникация министрлігінің жауапсыздығы. Мұндай бассыздық орын алмауы үшін тек президентке бағынышты әуе кеңестігін бақылайтын орталық ашу керек.
Ал құзырлы министрлік ардагердің айтқандарын жоққа шығарды. Яғни әуе көлігінің қондырғылары толық жұмыс істеп тұрған, мұз қатпаған және жанармайда жеткілікті болған. Қазір апат орын алған сәтте экипаж мүшелері өз орындарында болды ма, жоқ па сол тергелуде.
- Жалпы тергеуге қатысты сұрақ көп бірақ жауап аз. Арада бір жыл өтсе де апаттың толық мән-жайын ашып айтылмай отыр. Құзырлы орган қара жәшіктегі жазбаларды жариялауға асығар емес.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
