Зағип жандарға арналған жалғыз кітапхана өртеніп кетті
Қарағандыда зағиптар мен көздері нашар көретіндерге арналған кітапхана өртеніп кетті. Ғимарат жол картасы бағдарламасы бойынша бір ай бұрын ғана күрделі жөндеу жүргізіліп, жаңа құрылғылармен жабдықталған екен. Тілсіз жаудың кесірінен айналдырған 3-4 сағаттың ішінде 300 шаршы метр жердегі құнды техника мен мен жылдар бойы жиналған кітап қоры күлге айналды. Болжам бойынша өрт электр сымдарының қысқа тұйықталуынан шыққан.
Автор: Саят Сабдалы
29.01.2014
Тілсіз жау түн ортасында кітапханадағы тұрмыстық бөлмеден шығыпты. Отты бірінші байқаған күзетші әйел жанұшырып кітапхана директорын шақыртқан. Пеш жағушыны да оятып, өртті үш жақтап өз күштерімен өшіруге тырысқан екен.
Нұржан Үсенова, Қарағанды облыстық зағиптарға арналған кітапхана директоры:
-Отты өшіретін құралдарды қолдандық. Кейін өрт сөндірушілер де келіп жетті. Алайда жалын бой бермеді. Бүкіл құжат пен зағиптарға арналған арнайы компьтерлер түгел жанып кетті.
Түнгі 4-тен өте келген 10 техника мен 42 өрт сөндіруші жабылып жатып, тілсіз жауды 4 сағатта әрең ауыздықтағанымен, бықсыған ғимаратқа әлі ешкім кіре алмай жүр. Өйткені сөрелерде сіресіп тұрған кітаптың шоқтары әр жерден лап беріп жатыр. Қою түтін барлығының қолын байлаған. Қарағанды облысындағы 4 мыңдай зағип сауаттарын ашып келген жалғыз кітапханаларының жанып кеткенін естігенде егіліп жылай жаздады.
Қайыр Әбілдин,зағип:
-Дыбысталған кітаптар бар еді , дискке жазылған. Соны қолмен оқитын едік көзбен көрмесек те. Енді осындай пәлеге ұшырап қалғанымыз өте өкінішті.
-Мына жерде осыдан 4 жыл бұрын да өрт болған. Содан қалған кем кетіктер жамалып, ғимаратқа енді ғана сән кіргенде қайта қырсық шалып отыр. Енді көмекке зәру жарымжандарға жоғарыға тағы жалтақтауға тура келеді. Өйткені, ғимарат мемлекеттік бағдарламамен бір ай бұрын ғана толық жөндеуден өткен екен. Мұнда күлі қалған арнайы техниканың өзін алуға 10 миллион теңге жұмсалған көрінеді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
