Алматыда БМВ көлігімен  алты адамды қағып, біреуін мерт қылған  Мақсат Үсеновтың жазадан оңай сытылып кеткені қоғамның наразылығын тудырды. Бұған ызаланғандар Жоғары соттан істі қайта қарауды талап етіп жатыр. Тіпті ғаламторда жарияланған үндеуге марқұм жігіттің анасымен қатар 20 мыңнан астам азамат қол қойып үлгерген.   Ал осы шудан кейін Бас прокуратура қылмыстық кодекске өзгерістер енгізуге шұғыл кірісті. Оған сәйкес, бір адамды қағып өлтірген жүргізуші 10 жыл, ал бірнеше кісіні ажал құштырғандар 15 жыл түрмеге қамалуы мүмкін. Ал егер жүргізуші мас болса,тараптардың өзара келісімге келуіне мүлдем тыйым салынбақ.

Рамазан Сәрпеков, Мәжіліс депутаты:

-Қарумен атып өлтірдің бе, көлікпен өлтірдің бе, бір жерге қамап қойып тұмшалап өлтірдің бе, бәрібір адам өліміне апардың ғой. Оның жазасы соған сәйкес болуы керек деп отырмыз. Егер қасақана қылмыс санатына жатқызса, «абайсызда» деген сөз болмау керек.

Алайда, мәселені келісіммен шешу елде әбден жолға қойылған. Мәселен, Теміртаулық прокурор көлігімен адам қағып өлтірсе де, жауапкершілікке тартылған жоқ. Өйткені жәбірленушілермен татуласқан. Осылайша жазадан құтылуды  Астанадағы аудандық прокурордың көмекшісі де, ойлап жүр. Мақсат Шыңғысов Елорданың қақ ортасында зейнеткерді қағып өлтіріп оқиға орнынан қашып кеткен. Енді марқұмның туыстарын жағалап «бітімге келейік» деп  жүр екен.

Бақыт Күзенбекова, марқұмның апасы:

- Келісімге келейік деп қай бетімен сұрайды. Ол 24 жаста, ол 70-тегі кісі. Көрмей қалдым білмей қалдым демейді мен қорықтым дейді. Енді өзінің жасағанына сот арқылы жауап берсін. Біз татуласа алмаймыз. Біз адамды ақшаға сата алмаймыз.

Ал қылмыстық кодекстен «келісімге келу» деген талап мүлдем алынбайды. Оны қолдану үшін істе адам өлімі болмау қажет.

Иоганн Меркель, Бас прокурордың бірінші орынбасары:

-Тараптардың келісімге келуі үшін, біріншіден шығын толық өтелуі қажет. Екіншіден оған жәбірленушінің рұқсаты керек. Өзара татуласса, айыпталушы бостандыққа шығады. Ортақ тіл табыса алмаса, әрине, түрмеге тоғытылады.

-Бас прокурордың орынбасарымен ұзақ дауласқан депутаттар соңында жаңа қылмыстық кодексті бірауыздан бекітіп берді. Әйтсе де, алда екінші оқылым бар. Мәжілісмендер, апат орнынан қашып, зардап шегушіні қансыраған күйінде далаға тастап кететін жүргізушілерге де, жазаны күшейтпек ойда. Енді осы қатал талапты құжатқа қалайда «енгіземіз» деп білек сыбанып отыр.
 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!