Мақсат Үсенов шетел асып кетуі мүмкін
Прокурорлар Мақсат Үсеновті 45 тәулікке қамауға бекініп отыр. Қылмыстық жазадан құтылған жүргізушіні қадағалаушы орган әкімшілік кодекс бойынша қудаламақ. Олар жәбірленуші тараппен келісіп, темір тордан босап шыққан жігітке қатысты сот шешімін даулап, жазаны қатаңдатуды талап етті.
Автор: Олжас Байжан
31.01.2014
Әлішер Мырзаханов, Алматы қалалық прокуратурасының өкілі:
– Жол оқиғасының ауыртпалығын ескере отырып және оның оқиға орнынан бой тасалап кетуіне байланысты осы мәселелерді ескеріп оған тағайындалған айыппұлға прокуратура тарапы келіспей, оны «жеңіл жаза» деп тауып наразылық келтіріп отыр. Яғни оны қамауға алуды сұраймыз.
Тараптардың татуласуына орай, қылмыстық іс тоқтатылғанымен, әкімшілік кодекс бойынша сот Үсеновке айыппұл салып жазаның жеңіл түрін қолданғанына, қадағалаушы органның көңілі толмай отыр. Жол ережесін бұзғаны өз алдына, 6 адамды қағып айыппұлмен құтылуы дұрыс емес дейді прокурорлар. Сондықтан жарты миллион теңгенің орнына 45 тәулікке темір торға жабылуын сұрауда. Сот шешіміне олар өздерінің қарсылығын жолдап та үлгеріпті. Тек, білегін онсыз да кеш сыбанған прокурорлар Үсеновтың қазір қайда жүргенінен хабарсыз. Ақпараттарға қарағанда, жол апатына кінәлі жігіт шетел асып кеткен. Естеріңізге салсақ, Мақсат Үсенов қала ортасында BMW көлігімен бір топ адамды қағып, өзі оқиға орнынан қашып кеткен болатын. Салдарынан бір адам тіл тартпай кетсе, өзгелері түрлі дене жарақаттарын алған. Сот шешіміне қатысты қоғамда наразылық күшейген соң, кеше ғана «Экспо-2017» ұлттық компаниясында департамент директоры болған әкесі Қажымұрат Үсенов қызметінен кетіп тынған еді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
