Атырау әкімдігі күзде өтетін форумның дайындығына миллиардтап ақша жұмсап жатыр
Атырау алып құрылыс алаңына айналды! Алдағы күзде Қазақстан мен Ресей мемлекеттері басшыларының қатысуымен 11-ші аймақаралық даму форумы өтетіндіктен, мұнда қазір дайындық жұмыстары қызу жүріп жатыр. Әсіресе, мәртебелі меймандар жүреді-ау деген орталық көшелердің барлығы күні кеше асфальт төселсе де, қырып тастап, қайта жасалуда. Бұл жағынан қазына қаражатты аяр емес. Форумға дайындық үшін республикалық бюджеттен 5 млрд, ал облыстық қазынадан 3 млрд 300 млн теңге бөлінген.
Автор: Жанар Низамутдинова
22.07.2014
Форумға дайындықты атыраулық шенеуніктер қымбат көліктерге қол салудан бастады. Жалпы сомасы 150 млн теңгеге машина алғандарын айтып, тендер де жариялаған болатын. Бұдан кейін облыстық ішкі істер департаменті де әрқайсысы 100 мың доллар тұратын ToyotaLand Cruiser 200-дің екеуін алған.Сөйтсек, дайындық машина сатып алумен бітпепті. Қазір шенеуніктер қала ішін жөндеуге қызу кіріскен.
Орталықтағы негізгі деген 4 көшені орта деңгейдегі жөндеуден өткізу үшін қазынадан 3 миллиардқа жуық теңге бөлініпті. Бұл қаржыға облыстық әкімдік жанындағы төсемтастар да ауыстырылмақ. Миллиардтаған қаржыны игеруге жергілікті шенеуніктердің кірісіп кеткеніне бір айдан асты. Жол жиектерін граниттеп, ескі үйлерді әктеп-сырлау жұмыстары да қызу жүріп жатыр. Бірақ атыраулықтардың өздері бір күнге келіп-кететін қонақ үшін осыншама шашылғанша, өзіміздегі бастан асып жатқан мәселелерді неге шешпейді деп отыр.
Әсел Нұрғазиева, құқық қорғаушы:
- Жап-жақсы жолды қайта жөндеудің не қажеті бар еді? Атырауда осы жолдан басқа, форумнан басқа өзекті мәселе таусылып қалып па? Толып жатыр ғой! Мысал үшін айтайық, республикалық маңызы бар Атырау-Астрахань тас жолы. Адам шошырлық қой, күнде адам өліп жатыр сол жолда.
Қос ел басшыларының кездесуі мына зәулім сарайда өтеді. 2 миллиард теңгеге жуық қаржы жұмсалған нысан осы жылдың қазан айында пайдалануға берілуі тиіс. Бірақ айтулы форум қыркүйектің басына жоспарланып отырғандықтан, қазір бұл жерде құрылыс жұмыстары күні-түні жүріп жатыр. Форум өткен соң бұл нысан Неке сарайы ретінде пайдалануға берілмек.
Тағы бір өзгеріс, әуежайдан қалаға кірер жолдағы көпірдің жанына алып сағат орнатылды. 2 жарым ай бойы Украинада дайындалған гүл-сағатқа бюджеттен 20 млн.теңге жұмсалыпты. Салмағы 150 келілік сағат ДЖИПИЭС арқылы жұмыс істейді. Жергілікті әкім-қаралардың сөзіне қарағанда, мұның барлығы өзгенің алдында ұятқа қалмас үшін жасалып жатқан шара көрінеді.
Шыңғыс Мұқан, Атырау облысы әкімінің орынбасары
-Жұмыстардың барлығы жасалған жұмыстардың форум біткен соң қайтадан құлап қалмайды ғой, ол сол жерде қалады. Сондықтан кез-келген үлкен халықаралық шараға дайындалу керек, ол дайындалу тек қана біздің Атыраудың емес, жалпы Қазақстанның имиджін, Қазақстанның абыройын, Қазақстан деген осындай ел екен деп келген адам айтып кетсе, ол Атыраудың емес, Қазақстанның абыройы.
Айтпақшы, қос ел басшысы кездесетін сарайдың қарсы бетінде тоз-тозы шыққан қос ғимарат тұр. Бұл бұрынғы әкімнің кезінде басталып, кейін аяқсыз қалған 1200 орындық концерт залы мен 100 орындық монша. Кезінде қыруар қаржы бөлінген бұл екі нысанның соңғысы жуырда іске қосылмақ. Ал 4 млрд-тай қаржы жұмсалған кино-концерт залын әкімдік бұзып тастайтын болды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
