Құрбан айтта мал бағасы қымбаттап кетті
Бұл мейрам кезінде мал сатушылардың саудасы қызатыны белгілі. Тіпті малының құнын қатты шарықтатып жібереді. Ақтөбелік имамдар бағаны алдын ала көтертпеу үшін саудагерлерді келісімге шақырып, тіпті мешіт жанынан арзанға мал сатуға көндіріпті. Ал шығыс өңірлерде ұсақ малдың өзін 5-10 мың теңгеге қымбаттатып жіберген. Басқа аймақтарда да осындай жағдай байқалуда.
Автор: Жаңалық Ахаш
03.10.2014
Ақтөбедегі орталық мешіт өкілдері Құрбан Айтқа әзірліктерін пысықтап жүр. Мал соятын орыннан бөлек, мұнда елу қасапшы халыққа қызмет көрсететін болады. Олар екі апта бойы арнайы курстан өтіп, құрбан шаларда оқылатын дұғаларды үйреніпті. Жыл сайын Құрбан айт мерекесі қарсаңында мал құнын шарықтатып жіберетін саудагерлермен де мешіт өкілдері мәмілеге келген.
Руслан Елемесов, Ақтөбе облыстық «Нұрғасыр» мешітінің наиб имамы:
-Келісіммен отырған біздің кәсіпкерлеріміз бар. Олар күнделікті базардағы малдың бағасынан арзан құнмен «Нұрғасыр» мешіті жанынан мал сатады.
Қазір Өскеменге шалғай аудандардан мал сатушылар ағылып келіп жатыр. Құрбан айт қарсаңында бұл өңірге 4 мыңнан астам ұсақ мал жеткізілген. Бірақ бағасы әдеттегіден 5-10 мың теңгеге қымбаттырақ. Біреуінің құны 40 мың тұрады. Дегенмен, тұрғындар бұған да шүкіршілік етіп отыр.
Мәрия Дүкеева, Өскемен қаласының тұрғыны:
-Жыл сайын туған туыстарымызбен жиналып құрбандық шаламыз. Биыл да сөйтеміз. Бағасы әуелеп кетсе де амал жоқ.
Мал бағасының өзге өңірлерде де қатты қымбаттап жатқаны байқалады. Ал Семейдің орталығында мал сататын орын қарастырылмаған. Сондықтан саудагерлер қала іші мен мешіт айналысының қуыс-қуысына алдын ала төрт түлікті жеткізіп жатыр. Тіпті, көлігі жоқтарға үйіне дейін жеткізіп беруге тапсырыстар да қабылдайды екен.
-Мына жерден қуса, сол жаққа барасың. Ертен «Сарыға» кім келеді? Ешкім бармайды ғой дұрыс па? Алматы жолына бір қой үшін бармайды. Көбінесе телефонмен алып кетеді. Тапсырысты аламыз да,үйлеріне апарып береміз
-Құрбан айт мерекесі күнтізбеде қызылмен белгіленген. Бірақ биыл мейрам демалыс күніне дәл келгенімен, келесі жұмыс күндеріне жылжытылмайды. Себебі заң бойынша діни мерекелерге ондай ерекшелік берілмепті. Сондықтан Құрбан айттың үшінші күні, дүйсенбі әдеттегідей елімізде жұмыс күні болып қала береді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
