«Самұрық-Қазынаға» қарасты компаниялардың саны екі есеге қысқарады
«Самұрық-Қазынаны» үлкен реформа күтіп тұр. Мемлекеттің активтерін басқарып отырған әл-ауқат қоры тиімсіз компанияларының тең жартысын жаппай қысқартпақ! Бүгін Астанада президенттің қатысуымен ең ірі холдингті трансформациялау форумы өтіп, қорды жаңа бағытта басқару үшін арнайы бағдарлама қабылданды.
Автор: Ербол Сейілхан
06.10.2014
Түбегейлі жаңаруға көшкен «Самұрық-Қазына» трансформация форумына әлемге әйгілі сарапшылардың көбісін шақырған. Тіпті модератор ретінде Ресейден сұлу тележүргізуші қызды арнайы алдырыпты. Тәжірбиесімен бөлісуге келген шетелдіктер болса, жаңадан салынған «Назарбаев орталығының» сәулетіне таңғалып қайта-қайта суретке түсіріп алып жатыр. Ал басқосуға қатысқан президент 6 жыл бұрын құрылған «Самұрық-Қазынаның» негізгі міндетіне енді кіріскенін мәлімдеді.
Нұрсұлтан Назарбаев, Қазақстан Республикасының Президенті:
-Біз дүниежүзінің тәжірбиесін пайдаланып тиімділігі жоғары қор құрдық. Бірақ қаржы дағдарысына тап болып, қиын жағдайдан банктерді құтқаруға мәжбүр болды. Қазір жағдай дұрысталды. Сол себепті «Самұрық-Қазына» өзінің құрылған мақсатына қайта жұмыс істеуі тиіс.
Ал 100 миллиард долларға бағаланатын 80 пайыз мемлекет активтерін яғни, теміржол, мұнай-газ, энергетика, атом, әуе, телекоммуникация саласын басқарып отырған «Самұрық-Қазына»-ның алға жылжуы экономиканың дамып, халықтың тұрмыс жағдайының артуына әсер етеді. Сондықтан ұлттық компаниялардың басын біріктірген қор ысырапшылдықты қойып, үнемге көшпек. Қордың басқарма төрағасы Өмірзақ Шөкеевтың айтуынша, алдағы 3 жыл ішінде бір-бірін қайталайтын, тиімділігі аз, шығыны көп еншілес компаниялардың саны 600-ден 300-ге қысқармақ. Мұны өз бақылаума алам деген Елбасы осы жерде «Самұрық-Қазына» жүргізген «Халықтық IPO» бағдарламасына ерекше тоқталды.
Нұрсұлтан Назарбаев, Қазақстан Республикасының Президенті:
- Нақты жоспар болуы тиіс. Сол бойынша, акция байлардың емес, қарапайым тұрғындардың қолына тиюі тиіс. Айтқандай қазір сол акцияға әуес инвесторлар тәуелсіздік жылдарында байып алған. Тағы қол салуға дайын отыр. Үкімет оны қадағалау керек.
«Ал «Самұрық-Қазынаны» трансформациялау бағдарламасын қабылдаған Нұрсұлтан Назарбаев, айтылған реформаларды жедел іске асыруды талап етті.
-Сондай-ақ , Нұрсұлтан Назарбаев, бүгін «Самұрық-Қазынаға» қарасты ең үздік компанияларды атады. Көш басында, «Қазақстан темір жолы» «Назарбаев» университеті тұр. Ал сын естіп артта қалғандар «Кегок» пен «Қазпошта». Мемлекет қаржысының қайтарымын талап еткен Елбасы алдағы 5 жылда әлемдік деңгейге тым құрыса 3 компанияны шығаруға тапсырма берді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
