Жалған тірліктің қамытын киіп бес күндік өмірді бітпестей көріп пенделік қылатын адамзат міне Қағбаның түбіне жетіп оған алақаны тиіп дұға жасағанда тәубаға келеді көбіне. Қасиетті қара тасты Байтулла деп те атайды, расында бұл жерде камераға түсіру өзіңді жат елдің абақтысына айдағанмен бірдей. Алайда біздің ұжымға Әл Харам мешітінде мүмкіндік берілді. Жәннаттан жеткен тас болса Қағбаның бір бұрышында ғана, оған жету барша мүмін мұсылманның арманы. Тартыс та туады сондықтан. Бірақ мұнда басты қасиет сабыр болуы шарт.

Сансызбай Құрбанұлы, ҚМДБ бөлім басшысы:

-Байтулланы жеті мәрте айналу ол шариғатта парыз. Адамдарға зиян бермеу ол уәжіп. Ал тасты сүйем деп адамдарды қағып кетсең не болады? Сауап орнына күнә болады Жәннаттан келген тас ол қара тас, ол негізінде нұрлы тас болған. Оны Пайғамбарымыздан бұрын надандық дәуірінде адамдар дәретсіз, бойдәретсіз жалаңаш айналғандықтан Алла Тағала оны қарайтып қойды дейді.

Қағбаның қасиеті мен сауабы қисапсыз, мәселен мұнда оқылған намаз жүз мың рәкатқа пара пар келеді. Сол себепті Сафа мен Маруа арасында сағи жасамас бұрын барша мұсылман сәждеге маңдайын тигізіп құлшылық қылады. Қағба орналасқан Әл Харам мешітінде үш жылға созылатын қызу құрылыс жұмыстары басталған, қажылыққа байланысты уақытша тоқтапты. Ал бұл іс тәмамдалса бір мезетте 150 мың мұсылман тауап жасамақ.

-Міне төрткүл дүниедегі мүмін мұсылман қауымы үшін арманға айналған бірақ биыл тек бес миллионға жуық мұсылман бауырымызға нәсіп болған үлкен қажылық тәмамдалды. Қасиетті Қағбада қоштасу тәуабы жасалды. Енді бес парыздың бірін орындауға жеткен мұсылман бауырларымыз өз елдеріне қайта бастады, олардың көбісі Пайғамбарымыздың қабірін зиярат ету үшін Мединеге аттанды. Соның айқын дәлеліндей қазір Мекке қаласында көлік кептелісі мен адам нөпірі азайды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!