Ақтөбедегі ең жас батыр ана мал қорада тұрып жатыр
Ақтөбеде ең жас батыр ана баспанасыз босып жүр. 32 жастағы Айсәуле Сатыбалдиева 8 құрсақ көтеріп, қазір тоғызыншы сәбиіне аяғы ауыр. Бала-шағасымен облыс орталығынан жалдауға да пәтер таба алмаған. Енді амалсыз мал бағатын қожалықтың аядай бөлмесін паналауда.
Автор: Жаңалық Ахаш
07.10.2014
-Қайыңдысай ауылының іргесіндегі мына шағын үйде Бергешовтер отбасы тұрады. Олар бұл жерге жарты жыл бұрын көшіп келген. Көпбалалы отбасына жергілікті шаруа қожалығының басшысы бұл баспанада тұруға уақытша рұқсат беріпті. Ол үшін отағасы оның төрт түлігін бағып күнелтеді.
Отыз жасында алтын алқа иегері атанған Айсәуле бұғанда шүкіршілік етіп отыр. Себебі пәтерін жалға беретіндер бала санын көпсініп жолатпайды екен. Ал малды ауылдағы бұл үйдің таршылық етіп отырғанын бөлек, кем-кетігі көп. Терезесі шағылып төбесі тесілген. Батыр ана алдағы қыстың қамын ойлап алаңдайды.
Айсәуле Сатыбалдиева, Ақтөбе қаласының тұрғыны:
- Бес ұлым, үш қызым бар шүкір. Енді Елбасымыз, атқамінерлер көріп, естіп біліп көмек берсе дейміз. Баспана берсе. Сол жағынан қиыншылықтар болып жатыр.
Сегіз баланың алтауы іргедегі ауылға қатынап оқиды. Аядай бөлмеде ас ішіп, сабақтарына дайындалады. Ұйықтайтын, жуынатын жері де осы.
Әліби Ордабай, А. Сатыбалдиеваның ұлы:
- Өзіміздің үлкен үйіміз болса. Шамалы ақшамыз болып, осы үйден кетіп, үлкен үйге барсақ деп ойлаймын.
Айсәуле әр баланың өз несібесі барына сенімді. Ақтөбедегі ең жас батыр ана екенін айтып шенеуніктерге міндетсініп көрмепті. Тіпті көпбалалы отбасы ретінде пәтер кезегіне тұруға болатынын жақында білген. Сондықтан жеті мыңыншы болып тұрған тізімінің қашан басына жететіндігін биліктегілер айта алмайды.
Жанаргүл Дүйсекенова, Ақтөбе қалалық тұрғын үй қорын есеп алу секторының меңгерушісі:
-Тұрғын үйге кезекке тұрғызылды қыркүйек айынан ағымдағы жылдан бастап. Құжаттары халыққа қызмет көрсету орталығынан қабылданды. Кезекке қойылды, мемлекет қорынан үйді тек кезек бойынша ала алады.
Аймақтағы ең жас батыр ана тұрмыс тауқыметін алға тартып әлі де болса тосылып қалмайтындығын жеткізді. Енді келе жылы тағы бір бөбегін құшағына алғалы отыр. Бірақ бұл отбасы шілдеханаға дейін қоныс тойын тойлауды армандайды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
