Өтемақыға көңілі толмаған Көкпекті ауылы тағы шу шығарды
Көктемде су астында қалған Қарағанды облысындағы Көкпекті ауылының тұрғындары тағы шу шығарды. Бұл жолы үйлері тұруға жарамсыз деп танылмағанымен шығынға шаш етектен батқандары биліктің берген көмегіжыртығымызға жамау болмады дейді.Ал шенеуніктер наразы жұртпен кезекті рет кездесу өткізіп, істеген істеріне тағы есеп берді.
Автор: Саят Сабдалы
08.10.2014
Су апатынан зардап шеккен ауыл тұрғындарын сабырға шақырған жергілікті билік кездесуге есеп-қисаптарын көтере келіпті. Қойылған сұрақтарға сүрінбей жауап беріп, есептен жаңылмас үшін жазғандарын үлкен экранмен тамашалатты. Айтуларынша, тасқын судан зардап шеккен баспана иелеріне материалдық көмек ретінде 600 миллион теңгеден астам қаражат үлестірілген. Қырылған мал басы да тегіс түгенделді. Биліктегілер мұның барлығын демеушілік көмек ретінде қабылдау керек дейді. Себебі толық шығынды мемлекет емес, апатқа кінәлілер өтеуі тиіс. Оларды сот анықтайды. Ал тұрғындар сағызша созылып, күдіктілер бір-біріне сілтеп, сиырқұйымшақтанып бара жатқан тергеу ісінен күдер үзген.
Нина Иванова, Көкпекті ауылының тұрғыны :
-Мен зейнеткермін. Сондықтан мен әділдік орнағанша өмір сүрмеуім мүмкін. Күйеуім осы жазда уайымнан бақилық болып кетті. Тергеуге де, сотқа да жұрт сенбейді. Өйткені апатқа әу бастан биліктің шалалығы себеп болғанын біле тұра, қазір бәрін сотқа итеріп қойып, дым болмағандай отырсыздар.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
