Кузиндердің отбасында төрт бала бар. Жеті жасар Радмира биыл мектепке баруы тиіс еді. Бірақ ата-анасы оны үйде оқытпақ. Өйткені, білім беру жүйесіне баяғыдан көңілдері толмайды екен.       

Юрий Кузин, Павлодар қаласының тұрғыны:

-Мектептегі оқушы дәретханаға шығуы үшін де қолын көтеріп, сұрануы тиіс. Бала толығымен мұғалімге бағынады. Осылайша он жыл бойы біреудің қас-қабағына қарап өседі. Ал мен балаларымның қысылмай, еркін ер жеткендерін, білімді талап ету арқылы емес, өздерінің қалауы бойынша алғанын қалаймын.

Радмира – үйдегілердің үлкені. Ол биылғы қыркүйекте құрдастарымен мектеп табалдырығын аттамады. Айтуынша, көркемсурет, музыка мен шахмат үйірмелеріне қатысады екен. Әріп таниды, жазуы жинақы. Осылайша бүлдіршін мектепті қойып, аядай ғана үйде білім алуда. Бірақ заң бойынша мектеп жасындағы баланы білім ошағына жібермеу әкімшілік құқықбұзушылық болып саналады.

Ләйлә Жүсіпова, Павлодар қаласы білім бөлімінің бас маманы:

-Кузин Юрий - ол өзінің мектеп жасына жеткен 7 жастағы баласын мектепке беруден бас тартып отыр. Сол себепті кәмелеттік жасқа толмаған балаларды қарастыру комиссиясына шақырдық. Алдағы уақытта оған әкімшілік айыппұл салынуы мүмкін.

Салынатын айыппұл бар болғаны 10 мыңға жетер-жетпес. Дегенмен, өздері мұғалім мамандығы бойынша білім алған ер-зайыпты алған беттерінен қайтар емес. Ал келесі жылы бұл үйде тағы бір бала жеті жасқа толғалы отыр.

-Жеті жасар бала баруға тиіс білім ордасының ұстаздары бұл мәселеге қатысты арнайы комиссияның құрылғанын жеткізді. Оқушыны қатарға қосып, бағдарлама бойынша білім беру міндеттіміз дейді олар. Ал білім бөліміндегілер болса бұл бүгінге дейін Павлодардағы жалпы білім беру мектебіне баласын беруге қарсылық білдіріп отырған жалғыз отбасы екенін айтып отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!