29-шы мамырда Астанада Назарбаев, Путин, Лукашенко Еуразиялық экономикалық одақ құру туралы келісімге қол қойған-ды.Бірақ, толық заңды күшіне енуі үшін 3 мемлекеттің Парламенті бекітуі тиіс болатын. Өткен аптада құжатты төменгі палата дереу мақұлдаған соң құжат бүгін Сенаттың қарауына түсті. Оны қорғауға келген Ерболат Досаев одақтың пайдасы көп болатына депутаттарды сендіріп бақты.

Ерболат Досаев, ҚР Ұлттық экономика министрі:

-Қазақстанның экономикасының толық көлемде дамуы үшін жаңа мүмкіндіктер ашылады. Еуропа, Орталық, Оңтүстік-Шығыс Азия мемлекеттерімен байланыс дами береді. Бұл одақ  Еуразия өңірінің барлық елдерінің экономикасына үлкен жол ашады.

Сенаторлар да бірден сенді. Қазақстанның есесін түгендеп, ешкім қызыл кеңірдекке  салынбады. Тек кейбірінің импорт пен экспорттың көлеміне аздап алаңдағаны болмаса.

Светлана Жалмағамбетова, Сенат депутаты:

-  Статистикаға Үкімет мән беруі тиіс. Әйтпесе ол Қазақстанның пайдасына шешіліп жатқан жоқ.Бізде импорт көбейіп, экспорт азайып келе жатыр.  

Сенаттағы өкілеттігі аяқталатын болғандықтан ба, әйтеуір Жалмағамбетова батылырақ сөйледі. Қалғандары үн-түнсіз Еуразиялық экономикалық одақ туралы шартты бірауыздан мақұлдап жіберді.

-Қатысып отырғандар 44 сенатор. Дауыс бермеген біреу, жақтағандар- 43. Заң қабылданды.

Дауыс бермей қалған депутаттың кім екені белгісіз. Негізі одаққа қосылмас бұрын референдум өткізейік дегендер болған. Алайда сол ұсыныс, қарсылық интернеттегі талқылаудан арыға аса алған жоқ. 

Қожахмет Баймаханов, Сенат депутаты:

-Ресей, Беларусь болсын, өзіміздің бұрынғы ағайындарымыз ғой. Сондықтан, бұл жерде референдум өткізу меніңше артық.

Мұхтар Алтынбаев, Сенат депутаты:

-Бұл тек қана экономикалық саладағы қарым-қатынас. Ешқандай саяси салаға бұның қатысы жоқ. Егер, тәуелсіздігімізге қауіп төнсе, Қазақстанның одақтан шығуға құқығы бар.

Ал  Еуразиялық одақ туралы шартты ең бірінші болып Ресей бекітті. Бұған қатты қуанған мемлекеттік Дума депутаттары бұл күнді тарихи күнге балап, оны мерекеге айналдырды. Тіпті құжатқа әріптестерінен бұрын Путин қол қойып үлгерді.

-Бүгін «Еуразиялық одақ туралы шартты» Қазақстаннан кейін Беларусь те, дереу бекітіп үлгерді. Себебі ертең Назарбаев, Путин, Лукашенко Минскіде кездесіп, одақтың  жай-жапсарын талқылайды. Ал  2015 жылдың 1-қаңтарынан бастап іске асатын ұйымға Қырғызстан мен Армения қосылады деп күтілуде.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!