Әдетте депутаттар қонаққа келген министрлердің қолын алып, қолпаштап қарсы алады да, кетерінде көңілсіз шығарып салады. Бүгін де солай болды. Мәжіліске күліп кірген Асылан Сәрінжіпов сең соққан балықтай есіктен есеңгіреп шықты. Жиын басталмас бұрын депутаттар  министрге білім саладағы былық туралы дайындалған сюжеттерді көрсетіп алды да, артынша сан сұрақтың астына алды. 

Зағипа Балиева, Мәжіліс депутаты:

-Министр мырза, математика, алгебра, геометрия сынды нақты пәндерді жыл сайын жаңартудың қажеті не? Тарих, география болса бір жөні, жаңа дерек қосылуы мүмкін. Меніңше,біреулер баспалармен бірігіп бизнес жасап отыр.

Сәрінжіповтің бұған жауабы дайын екен. Енді оқулықтарды 4 жылда бір рет жаңартамыз деп құтылды.

Дариға Назарбаева, Мәжіліс төрағасының орынбасары:

-  Енді оқулық тізімі 4 жылда бір рет қаралатын болады. Бұл күнге де жеттік. Осыны түсінген минитсрге рахмет.

Ал, қыркүйектегі жұрттың кітап таппай сандалғанына жергілікті білім басқармалары кінәлі, - деді министр. Тапшылық туралы уақытында ақпарат бермегендерді тіпті жақында қатаң жазалапты да. Бүгінгі жиынға сол аймақтардағы айыпты шенеуніктер де келді. Бірақ, олардың бірі де өз бетінше ақталуға жарамады. Есесіне дептуттардың тоқпағына әбден үйреніп алған Сәрінжіпов бар мәселені келесі жылы жайғастырамын деп сендірді. Ол үшін министр бірқатар жоспар да құрып қойыпты.

Асылан Сәрінжіпов, ҚР Білім және ғылым министрі:

-Енді 1-ші қаңтарға дейін мектептер өздеріне қажетті оқулықтардың тізімін өткізетін болады. Ал, ақпанда Білім басқармасы баспалармен келісімге отырады. Мамырдан бастап кітапты жеткізуге қатысты мемлекеттік байқау басталады. Сонда биылғыдай оқулық тапшылығы қайталанбайды. 

Мәжілісмендер тапшылықтан өзге сансыз кітаптардың салмағына да  алаңдаушылық білдірді. Өйткені, қазіргі оқулықтардың басым бөлігі санитарлық талапқа сай келмейді.Оның үстіне бір пәнге бірнеше оқулық бар. Депутаттар бұл мәселені шешуде тосын ұсыныс жасады. 

-Жалпы, Мәжілісте бүгін көп ұсыныс айтылды.  Депутаттар: «кітапқа тапсырыс беруді Білім министірлігі  жеке жауапкершілігіне алу керек» деген де кеңес беріп еді. Сәрінжіпов бұдан  бірден ат тонын ала қашты. Ал, Кеңес кезіндегі жүйеге қайта оралуға қатысты министр тіл қатпады. Соған қарағанда бұл ұсынысты да аса қолдай қоймаған сыңайлы. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!