Ақтөбе облысында қарт майдангер соғысқа қатысқанын дәлелдей алмай жүр
Ақтөбе облысының тұрғыны өзінің соғыс ардагері екенін қаншама жылдан бері дәлелдей алмай жүр. 88 жастағы Көпбай Тәжіғалиев бір жыл қан майданда болып, кейін төрт жылын жат жерде әскери қызметте өткізген. Ақсақалдың соғысқа қатысқанын тіпті Ресей билігі мойындап, жақында медальмен марапаттапты. Бірақ еліміздің шенеуініктеріне бұл аздық етіп отыр. Мұрағаттан қосымша құжаттар сұрап, қарияны сандалтып қойған.
Автор: Жаңалық Ахаш
14.10.2014
Байғанин ауданында тұратын Көпбай ақсақал соғысқа 1944 жылы аттаныпты. Еуропа жерін азат етуге атсалысып теңізде әскери борышын өтеген. Еліне араға бес жыл салып оралады. Қиын күндердің артта қалғанына шүкіршілік еткенімен, бейбіт заманда еңбегінің еленбегеніне өкпелі.
Көпбай Тәжіғалиев:
- Қалай бес жыл шыдайсың? Бала кезіңнен кетіп алып. Сондай қиындықтарды бастан өткердік.
Көпбай ақсақал қазір тыл ардагері ретінде есепте тұр. Ал соғысқа қатысқанын дәлелдеу үшін шенділер «Германияны жеңгені үшін» медалін сұратқан. Себебі соғысқа қатысқандардың барлығына кезінде осы марапат табысталыпты. Қарттың тегінде бір әріптен қате кетіп, онысы жақында қолына тиген екен. Тіпті Ресей президентінің қолы қойылған құжат пен арнайы медаль қоса табысталады. Бірақ қорғаныс саласының басшылары мұны да азсынып отыр.
Эдуард Тәжіғалиев, К. Тәжіғалиевтың ұлы:
-Енді білмеймін, Ресей Федерациясының президенті Путиннің қолы қойылып,дәлелденді. Енді қай жерін анықтайын деп жүргенін білмеймін. Әлде уақыт созып жүр ме? Аудан басындағы барлық инстанциядан өттім.
Өңірдегі қорғаныс департаментінің өкілдері Көпбай ақсақалдың полкы соғыс жылдары запаста болған дейді. Сондықтан енді осы бөлім жауынгерлерінің елді жаудан азат етуге қатысқанын растау қажет. Ал Ресей президенті жолдаған марапат пен анықтама дәлел бола алмайды екен.
Әмір Жұмағұл, Ақтөбе облыстық қорғаныс істері жөніндегі департаменттің бөлім басшысы:
-Ресей мұрағаттарынан сұрап жатырмыз. Жауап келген соң ғана нақты шешім шығады. Біз бұған дейін теңіз полкының запаста болғанын ғана білдік. Тағы қосымша мәліметтер қажет болып отыр.
Ресейге қайта жолданған сауалдың жауабы енді 2-3 айдың ішінде келуі керек. Ақсақал да соны зор үмітпен күтіп отыр. Көзінің тірісінде өзіне тиісті мәртебеге ие болсам деп армандайды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
