Шучьенің шенеуніктері жылу беру үшін Кулагиннің нұсқауын күтіп отыр
Ақмола облысының Щучье қаласы қысқа әзір болмай шықты. Мұнда өткен аптада берілген жылу аяқ астынан тоқтап қалған. Себебін сұраған жұртқа жылу орталығындағылар отын жоқ деп түсіндіріпті. Енді тұрғындар «қыс басталмай жатып, неге бұлай болды?» деп дабыл қағуда. Қазір, әсіресе, мектеп пен балабақшалар азынап тұр.
Автор: Айзат Тұрғынбекқызы
14.10.2014
Щучьедегі жылу маусымы 1 аптаға ғана жетті. Күздің қарлы жаңбырынан кейін жылынып үлгермеген жұрт кенеттен болған жағдайға аң-таң.
Бегім Жапаров, Щучье қаласының тұрғыны:
-1 апта жақты. Жаңа әкім келді, жолы жеңіл болды деп қуанып отырғанбыз. Енді міне, сөндіріп тастады. Отынды неге ерте ойламаған?
Жұрт тіпті қысқа әзірлікті өз күштерімен жүргізгенін айтады.
Александр Черников, Щучье қаласының тұрғыны:
-Құбырларды, шатырға дейін өзіміз ауыстырдық. Енді жылу жоқ. Оның ақысын алдын-ала төлеп те қойдық.
Мынау – «Бөбек» балабақшасындағы сәбилер. Бір-біріне ұйлығып, электр жылытқышымен жылынып отыр. Біраз күнде ғимарат іші әжептәуір салқындап қалған. Бірақ меңгеруші мұны жұртқа білдіргісі келмейтін тәрізді. Жылытқыштың жанындағы термометрді көрсетіп әлек. Мектепте де осындай жағдай. Балалардың көпшілігі сабақта сырт киіммен отыр.
-Апта соңына дейін жылу болмайды. Өйткені отын жоқ.
- Бұл – жылу орталығы диспетчерінің жауабы. Бізді тұрғындардың бірі деп қалды ма, ағынан жарылды. Бірақ кейіннен әкімдіктегілермен кездескенімізде,олар жағдайды басқаша түсіндірді.
Щучье қаласындағы көпқабатты үйлердің 75 пайызы жылуды қабылдауға әзір емес екен. 2 ай бұрын келген жаңа басшылық бұны қадағалап үлгермеген. Енді жылуға 17 миллион теңге қарыз деп тұрғындардың өзін кінәлауда.
Виктор Бахмат, «Термотранзит» коммуналдық кәсіпорыны директорының міндетін атқарушы:
-Біз жылуды мүлдем тоқтатқан жоқпыз. Әрине, әлеуметтік нысандар қиындық көріп отыр. Облыс әкімі Сергей Кулагин бізге осылай істеңдер деді. Тұрғындар қарызды төлесін. Үйлер мүлдем әзір емес. Ал біз сақадай сай тұрмыз. Отын жеткілікті. Рас, мазутты Павлодардан аз-аздап жеткізіп жатырмыз. Сөйтіп, электр қуатын үнемдеуіміз керек.
Аудан басшылары да бізді негізгі жылу орталығына алып барды. Ондағы 4 қазандықтың біреуі ғана істеп тұр екен. Биыл сұйық отын алуға мемлекеттен 750 миллион теңге бөлінген. «Егер облыс әкімі қазір бұйрық берсе, біз жылуды қазір қосамыз» дейді аудан әкімінің орынбасары. Бірақ тұрғындардың Кулагиннің нұсқауын күтіп, қашанғы қатып отырары белгісіз.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
