Петропавлда екі баласы бар келіншек пәтерінен қуылып жатыр
Петропавлдың шенеуніктері екі баланың анасын баспанасынан қуып жатыр. Өзі де жарымжан келіншектің бір қызы туғаннан мүгедек. Осыған қарамастан әкімдік қызметкерлері олар паналап отырған жатақхананың бөлмесін босатуды талап етіпті. Тауы шағылған келіншек енді барар жері болмай, басы қатып отыр.
Автор: Гүлмира Тасболатқызы
16.10.2014
26 жастағы Анна Горяйнованың өзі бала кезінен мүгедек. Сал ауруына шалдыққан тұңғышы Арина 6 жасар. Ал кенжесі Вероника бірге жақында ғана толыпты. Небәрі 13 шаршы метр болатын мына бір бөлмені паналап отыр. Күйеуімен заңды түрде айрылысқанымен, оның да барар жері болмағандықтан, осында қонуға келіп тұрады екен. Қаржы жағынан да аздап көмектесетін көрінеді.
-Қаладағы жатақханалардың біріндегі бөлмені Аннаның бұрынғы күйеуі зауыттан осыдан он жыл бұрын алған. Алайда осы уақытқа дейін жекешелендірудің сәті түспепті. Кейде құжаттар жиналмайды, кейде ақша болмайтын дейді келіншек. Қазір бұл бөлме әкімдіктің балансында тұр.
Жуырда шенділерден келген хат келіншектің төбесіне жай түсіргендей болды.
Анна Горяйнова, Петропавл қаласының тұрғыны:
-Әбден жыладым. «Бөлмені босатыңдар» деп жазыпты. Енді қайда барарымды білмеймін. Келіп, дүние-мүлкімді сыртқа лақтырса не істеймін?
Түні бойы көз ілмеген келіншек таң ата әкімдікке келді. Шенділер сонда ғана кімді далаға қуып жатқанына көздері жетті. Даулы бөлмені паналап отырған отбасының жағдайын білуге бұған дейін ешкім құлық танытпаған тәрізді.
Анна Горяйнова, Петропавл қаласының тұрғыны:
-Ешкім келіп, жағдаймызыды білген жоқ.Тек құжаттармен ғана жұмыс істеген. Ал бұл бөлмеде кімдердің, қалай тұрып жатқаны оларға бәрібір болған ғой сонда.
Келіншектің коммуналдық қызметтерге қарызы 50 мың теңгеден асып кеткен. Ақшаны үлкен қызымды емдеуге жаратып қойдым дейді. Шенділерге отбасын баспанадан қуып шығуға негіз болған да осы берешегі екен.
Бауыржан Бейсенбаев, Петропавл қалалық тұрғынүй бөлімінің сектор меңгерушісі:
-Қазір бұл отбасыға қатысты барлық құжаттарды жинаймыз. Сонан соң олардың мәселесі тұрғын үй комиссиясының отырысында шешілетін болады. Жауапты жазбаша түрде өздеріне жолдаймыз.
Басшылар келіншекті күздің қара суығында далаға қумаймыз деп сендірді. Ал Анна Горяйнова құжаттарын қайта жинап, бөлмесін жекешелендіріп алуға кіріскелі отыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
