Ақтөбеде оқушыларға көшеде жүруге тиым салынды
Ақтөбеде кешкі сағат алтыдан кейін оқушылардың көшеде ата-анасыз жүруіне тыйым салынды. Әсіресе, бастауыш сынып оқушыларына бақылау күшейді. Мұндай шара Темірлан Сәндібаев жоғалып кеткеннен кейін қолға алынып отыр. Алты күн бұрын қақпа алдында ойнап отырған жерінен ұшты-күйлі жоғалған 5 жасар бала әлі табылған жоқ. Қаланы тәртіп сақшыларынан бастап, еріктілер мен жауынгерлер де толық сүзіп шыққан. Тіпті шағын ұшақпен де іздеуге кірісті.
Автор: Жаңалық Ахаш
16.10.2014
-Қазір кез-келген ақтөбелік аман-саулықтан соң ең бірінші Темірланның жайын сұрайтын болған. Жоғалып кеткен бала әлі де іздестірілуде. Бұл іске алғашқыда мыңнан астам тәртіп сақшылары мен еріктілер тартылса, кейін қатарларына әуе қорғанысы күштері институтының курсанттары мен жергілікті әскери бөлім жауынгерлері қосылды. Олар қаланы толық сүзіп шықты. Бірақ әзірге нәтиже жоқ.
Қазір еріктілер қала іргесіндегі ауылдар мен ой-шұңқырларды аралап жүр. Іздеуге тіпті жеке компанияның шағын ұшағын да шығарған. Жоғалғанына бір аптаға таяса да, жұрт Темірланның табылатынына үмітті.
Аида Тілегенова, еріктілер тобының жетекшісі:
-Қазір тығырыққа тіреліп отырмыз.Халық арасында түрлі қауесеттер жайлап кетті. Бірақ дәлелсіз әңгімеге тұрғындар сенбесе екен. Ол іздеуге кедергі келтіреді. Үмітсіз –шайтан. Еріктілер көріпкел, балгерлерге де жүгінді. Арамыз аздап сиресе де, іздеуді тоқтатпаймыз.
Темірланның туыстары тәртіп сақшыларының іздеу жұмыстары кезінде үш адамның мүрдесін тапқандарын айтады. Оның бірі оқушы қыз көрінеді.
Аймереке Сәндібайқызы, Темірланның апасы:
-Біздің баланың арқасында үш мәйітті тапқан. Құдыққа түсіп кеткен бала мен жарты денелі үлкен кісіні саяжайдың маңынан тауыпты. Сосын бір қыз бала бар.Бұл жайында ешкім ақпарат бермеген сияқты.
Бірақ бұны тәртіп сақшылары растамады. Сонда да жұртта үрей бар. Темірлан жоғалған көшеде бұрын бала-шаға көп жүретін. Қазір жым-жырт. Тұрғындар баласын ауласынан шығаруға қорқады. Себебі олар оқушыны біреу ұрлап кеткеніне сенімді. Оның үстіне иісшіл ит те ауладан ондаған метрге дейін барып, әрі қарай иіс сезбепті.
Нина Жуковская, көршісі :
-Оны ұрлаған. Адасып кетті деуге келмейді. Өйткені бұл маңды жақсы біледі. Бала жоғалғалы бері көшеге шығуға қорқамыз.
Қазір қалада оқушылардың кешкі алтыдан соң ата-ана қадағалдауынсыз жүруіне тыйым салынды. Темірлан оқитын №14 мектептің мұғалімдері әр баланың білім ошағынан үйіне жеткенін жеке-жеке бақылап отыратын болған.
Майра Құрашова, №14 мектеп директорының орынбасары:
-Ата-аналар жиналысын өткіздік. Балаға сақ болыңыздар деп ескерттік. Ел-аман жұрт тныш қой.
Тәртіп сақшылары Темірланның тірі екенін емеурінмен білдіруде. Адам ұрлығы бойынша қылмыстық іс қозғап, бірнеше болжам жасапты. Бірақ оны тергеудің құпиялылығына байланысты жарияламай отыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
