Талас ауданының ақхалаттылары ақжағылар қадірімізді түсінбеді деп ашынады. Айтуларынша, жергілікті билік жас мамандарды аттай қалап шақыртып, енді итше қорлап жатыр екен. Келісім-шарт бойынша өзге өңірден келген жас дәрігерлерге пәтер үлестірілген. Енді жеме-жемге келгенде қалдық сомасын төле деген жаңалық ашыпты. Бас көтергендер баспана құнынан да асып түсетін қаржыны төлеуге қарсы.

-Жекешелендірумен шатастырмаңыздаршы өтініш, біздікі жеке меншік. Біз ешнәрсе төлемейміз. Қалдық сома төлемейміз.

Дәрігерлердің айтуынша, келісім-шартта тайға таңба басқандай пәтерді бес жылдан соң меншіктеуге болады деп көрсетілген. Қалдық ақшасы туралы жазылмаған деп отыр. Онысы аздай шенділер жуырда жаңа келісім-шартты ұсыныпты. Онда баспаналы болу үшін тағы бес жыл ауданда қызмет қылуы керек делінген. Әкімдіктің осы талабы жастарға жақпай қалған. 

Ербол Ибрагимов, дәрігер:

-Тіптен орындамаған жағдайда облыстық сотқа барамыз, олар орындамаса республикалық сотқа барамыз, одан кейін президенттің сайтына жазуға мәжбүр боламыз. Егер ол тараптардан біздің пайдаға шешілмесе, онда жұмыстан бәріміз кетеміз.

Ал, өздеріне шаң жуытпаған атқамінерлер жағдайдың ушығуына бір жыл бұрынғы шыққан жаңа қаулы себеп деп салды. Соған сәйкес, қайта келісім-шарт жасалып, пәтер енді бес жылдан кейін үлестірілмек. Қосымша қалдық соммасын да төлеуге міндетті. Дегенмен шенділер бүгінгі шу шығарған жастардың мәселесін май-шаммен қарауға, тіпті орайын тауып шешіп беруге ант-су ішті. 

Серік Дадабаев, Талас ауданы әкімінің орынбасары:

-Мамандар заңды келісім-шарпен жұмыс істеп жатыр. Әкімшілік тарапынан заңды пәтер берілді. Олар тұрып жатыр. Ал енді мынау заңға өзгерістер енгізілуіне байланысты, шешілетін мәселе ғой, өзгеріске байланысты. Бұл жерде ешкімді кінәлі деп айтуға болмайды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!