Атырауда майордың өліміне қаржы полицейлері айыпталып жатыр
Атырауда қаржы полициясының екі қызметкері сот алдында жауап беруде. Оларға Исатай аудандық ішкі істер бөлімінің бұрынғы басшысы Алтынбек Құбайдуллинді тергеу кезінде қызмет бабын асыра пайдаланды деген айып тағылып отыр. Тәртіп сақшысы биыл сәуір айында пара ретінде 250 мың теңге мен 3 келі қара уылдырық алып жатқан жерінде ұсталған. Бірақ тергеу аяқталмай жатып, асылып өлді. Марқұмның туыстары суицидке итермеледі деп сол қаржы полицейлерін кінәлауда.
Автор: Жанар Низамутдинова
21.10.2014
Шулы іске қатысты алғашқы сот отырысына жәбірленуші тарап түгел келген. Олар сот басталмай жатып-ақ, Атырау облыстық қаржы полициясының басшыларын жерден алып, жерге салды.
-Мыналарды көргенде қалай шыдаймыз жауыздарды. Жалғыз баламнан айырып отыр жауыздар, балаларынан айрылсын...
«Қызмет бабын асыра пайдаланды» деген айып тағылған жедел іздестіру бөлімінің бастығы Бауыржан Ертаев пен тергеуші Айбар Сарин де отырысқа тергеу қапасынан емес, жұмыс орындарынан келді. Қамауға алынбақ түгілі, айыпталушыларға әлі күнге сөгіс те жасалмаған сыңайлы. Құбайдуллиннің жақындарын ашындырып отырғаны да осы.
Ахмет Сырым, адвокат:
-Жауапқа қаржы полициясының басшылары да тартылуы қажет. Бұл қылмыстық істі бір-екі емес, бірнеше адам бірігіп, топ болып жасаған. Біз өз тарапымыздан істі қосымша тергеуге жіберу туралы қолдаухат дайындап отырмыз.
Исатай аудандық Ішкі істер бөлімінің бастығы Алтынбек Құбайдуллин сәуір айында парамен қолға түскен. Қаржы полициясы оны браконьерлерден 3 келі уылдырық пен 250 мың теңге алып жатқан жерінде құрықтаған болатын.
-Құбайдуллин,мына ақша туралы не айтасыз?
- Қасақана істелген
Бірақ сол түні денсаулығы нашарлаған майор ауруханаға жеткізілген. Кейін сол жерден қашып шығып, қаладағы құрылыс нысандарының біріне барып асылып қалған. Марқұмның туыстары суицидке қаржы полициясы қызметкері итермеледі деп отыр. Дегенмен, ресми айып оларға тек қызмет бабын асыра пайдаланды деп тағылған.
-Сондықтан жәбірленуші тарап, қос қызметкер жеңіл жазамен құтылып кетеді деп алаңдаулы. Олар енді істің «ауыр зардаптарға әкеп соқтырған заңсыз ұстау» бабы бойынша қаралуын талап етуде. Соған қарағанда, алты ай бойы тергелген атышулы іске әзір нүкте қойылмайтын секілді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
