Келімбетов отставка туралы сұраққа жауап беруден бас тартты
Келімбетов өсек таратуға үйір тәуелсіз сарапшыларға шүйлікті. Еліміздің бас банкиріне олардың теңге құлдырайды деген болжамдары жақпай қалыпты. Өзіне ғана сенуге кеңес берген Ұлттық банктың төрағасы бұл жолы да девальвация болмайды деді. Ал уәдеңіз орындалмай қалса отставкаға кетесіз бе деген сауалға сол күйі жауап берген жоқ.
Автор: Ербол Сейілхан
21.10.2014
Елді девальвация елесі қайта кезген соң Келімбетовтің өзіне мән-жайды түсіндіруге тура келгендей. Бас банкир көпті толғантқан басты сұраққа түк болмағандай әдеттегісінше, жылы жымиып отырып жауап қатты. Сөйтті де, алдағы 3 жылда девальвация нақты болмайды деп тағы ант су ішті. Тіпті тұрғындарды сабырға шақырып соңғы уақытта тым көбейіп кеткен сарапшылардың сөзіне сенбеуге кеңес берді.
Қайрат Келімбетов, ҚР Ұлттық банк төрағасы:
-Менің ойымша,3-5 жылдың ішінде, ешқандай өзгерістер болмайды. Сондықтан ол туралы ешқандай ой болмауы керек. Қазір сарапшылар көп нәрсені айтады. Бірақ менің ойымша, негізгі Ұлттық банктің резервтеріне қарап баға беру керек.
Экономикалық ахуалға қатыстыболжам жасайтын сарапшыларды нақты дәйектен көрі, өсекке үйір деп мұқатқан Келімбетовтың сенімді сөйлеуі кейін белгілі болды. Сөйтсек, оның көңіліне демеу болатыны Ұлттық қордағы ақша екен.
Қайрат Келімбетов, ҚР Ұлттық банк төрағасы:
-Ұлттық банктің резервтері 28 миллиард доллар. Ұлттық қорда бізде 76 миллиард доллар. Жалпы сомасы мемлекеттің резервтері 104 миллиард доллар.
Осы қаржы теңгені құлдыртапай ұстап тұруға мүмкіндік беретін көрінеді. Сондықтан доллардың бағамы алдағы уақытта 188 теңгеден аспауы тиіс. Келімбетовты әлемдік нарықтағы мұнай бағасы мен Ресей рубльінің күн сайын құлдырауы да қорқытып отырған жоқ. Бәрін бақылауда ұстап отырмыз деген бас банкирдің уәдесіне тілшілер күмән келтірді. Девальвациядан аузы күйген жұрт тағы алданып қалса, «отставкаға кетесіз бе?» деген сұрақты төтесінен қойды. Әккі Келімбетов болса бұл сауалдан жымысқы күлкісімен құтылып кетті.
-Халық екінші рет алданса қызметіңізде отыра бересіз бе?
-Күлкі. Көп рахмет.....
-Осылайша кезекті рет уәдесін үйіп төккен Келімбетов айырбастау нүктелерінде валюта жетіспей жатыр деген әңгімені де, жоққа шығарды. Барлық сөзі оптимизге толы. Алайда бас банкирдің сөзі мен ісінің қаншалықты қабысататынын алдағы уақыт көрсетеді. Өйткені ақпандағы девальвациядан соң жұрт Ұлттық банкке асқан күдікпен қарайды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
