Осыдан екі апта бұрын мүгедек балаларды асырайтын кісінің үйіне екі баласын жетектеген келіншек көмек сұрап келіпті. 10 күн бойы осында жатып әлденіп алған әйел, балаларын қалдырып өзі із суытқан. Сол күйі хабарсыз кеткендіктен, үйдің иесі бүлдіршіндерді полицяға тапсырды. Тек анасының есімін ғана білетін балақайлардың жасы 4-5 шамасында.

-Әкеңнің , аты кім?

-Нұржан!

- Әкең қайда? Әке-шешең ұрысып қалды ма?

-Мама жылады.

-Сөйтіп кетіп қалды ма сендерді алып?

-Иә.

Әкесі Астанада жүргенін айтқан жәутең көздер, анасының басқан ізінен бейхабар. Балабақшаның да табалдырығын аттап көрмегендер әзірше уақытша бейімдеу орталығын паналауға мәжбүр. Мұнда психологиялық және медициналық тексеруден өтпек. Ал, полицейлер іздеу салынғандар табылған жағдайда, ата-аналық құқынан айырамыз деп отыр.

Гүлназ Мүтәліп, Тараз қалалық ІІБ инспекторы:

-Мұндай жағдайда ата-аналары міндетті түрде әкімшілік жауапкершілікке тартылады. Бұл ата-ана құқынан айыруға бірден бір себеп.

Мойынқұм ауданында тас жолдың бойында жападан жалғыз жүрген тағы бір бүлдіршін кезікті. Полицейлер алдымен оның басындағы жарығын тіктіріпті. Өзінің сөзінше төбесіне теледидар құлаған екен. Алты жастағы бірінші сынып оқушысы анасымен көршісінің үйінде тұрғанын айтады. Табыс табуға шығып кеткен тасжүрек шешесі, қайта оралмаса керек.

-Анашым келші, алып кетші бізді. Үйге қайтқым келеді. Мектепке барғым келеді. Мектепке бармасам ертең кіргізбейді ғой бізді.

Тілі тақылдаған бүлдіршін өзге тастандылармен бірге уақытша бейімдеу орталығына жеткізілді. Ата-аналары табылмаса бұл үшеуі балалар үйіне табысталады. Ал, тәртіп сақшылары нақты дерек келтіре алмағанымен, өткен жылмен салыстырғанда биыл баладан безіну жағдайы жиілеп кетті деп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!