Динозаврлар мен гуманоидтар Семейде
Динозаврлар, гуманоидтар мен Эбола вирусы Семейде. Осы үрейлі дүниелердің барлығы еліміз бойынша алғаш рет Семейде ашылғалы тұрған аниматроникс паркінде жұрттың назарына ұсынылмақ. Ондағы кейіпкерлерді шынайы нұсқасынан айнытпай жасау үшін 30 адам 12 жыл бойы тапжылмай еңбек еткен.
Автор: Олжас Сайлаубекұлы
23.10.2014
Алып анаконда, қолтырауын мен жұмыртқаларын қорғап отырған птеродактель. Мұны көріп, ежелгі дәуірден бір-ақ шыққандай әсер аласың. Бұл Семейде ашылуға әзірленіп жатқан алғашқы, теңдесі жоқ аниматроникс.
Мұнда жануарлардан бөлек, өзге ғаламшардан келген гуманоидтарды да көруге болады. Бүкіл әлемді дүр сілкіндірген Эбола вирусы да осында. Көздің жауын алар роботтарды әзірлеу үшін 30 шақты адам 12 жыл бойы еңбектеніпті.
Тимофей Митрофанов, Механик:
-Өте үлкен жұмыс атқарылды. Компьютерлік бағдарламасы, механизмін жасадық. Ал жануарларға теріні арнайы суретшілер әзірледі. Еңбегіміз құр кетпеді деп санаймын.
Кіші-гірім бақылау бөлмесінде мұндағы барлық жануарларды басқару бағдарламалары орнатылған. Бұл жерден әрбір роботтың қозғалу жылдамдығы мен шығаратын даусы реттеледі.
-Мұнда келушілердің қызығушылығын мына алып өрмекші тудырады деп күтілуде. Оны жасап шығару үшін 2 жылдай уақыт кеткен. Жанында торға түскен адамның мүсіні де бар. Оның бет-әлпетін келтіру үшін мұндағы қызметкерлердің бірінің бейнесі қолданылған екен.
Мұнда сондай-ақ бойы екі қабатты ғимаратпен бірдей болатын роботтар да бар. Даусы құлақ жаратын динозавр мен әйгілі кинг-конгке бөлек бөлмелер қарастырылған.
Вадим Гостев, Өнертапқыш:
-Горилла немесе кинг-конг жайлы айтсақ, оның үстіндегі жүні жасанды емес. Оған кез келген материалдың келмейтінін білдік. Жабайы бұқаның бір табынын тауып, жүнін қырқуға тура келді.
Шетелде аниматроникстер аз болғандықтан, тәжірибе алмасатын ешкім болмапты. Отандық аниматроникс авторларының жұмысын алғаш боп жетімдер үйінің тәрбиеленушілері бағаламақ. Ал қалғандарына кіру ақылы.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
