Қызметкері қылмыс жасаса, басшысының отставкаға кетуі талап етілмек
Жемқор қызметкері үшін қалайда бірінші басшысы жауап беруі тиіс. Сенаторлар, орынбасары пара алып ұсталған министр, әкім және де басқа лауазымды шенеуніктерді бірден отставкаға жіберуді заңмен бекітуді ұсынды. Бір қызығы мұндай талап бұрыннан бар екен. Бірақ, ол заң жүзінде емес, мемлекеттік қызметтің ішкі ережесінде ғана көрсетілген болып шықты!
Автор: Жәудір Оразхан
23.10.2014
Қайрат Қожамжаров, ҚР Мемлекеттік қызмет істері және сыбайлас жемқорлыққа қарсы іс-қимыл агенттігніің төрағасы:
-Қазіргі кезде мемлекеттік қызметке өту туралы ереже бар. Ол саяси мемлекеттік қызметкерлерге қатысты. Бұл түзету 2013 жылы енгізілді. Онда егер жетекшілердің, саяси мемлекеттік қызметкерлердің қарамағындағыларының бірі сыбайлас жемқорлығы үшін сотталатын болса, сот үкімі заңды күшіне енсе, оның отставкаға өтініш беруі керектігі туралы айтылған.
Онда да пара алғаны дәлелденген орынбасарын жеке өзі тағайындаса, министр не әкім жұмыстан кету туралы арыз жазуы тиіс. Өтінішті Президент 1 айдың ішінде қарастырады. Орнында қалдыру, не қалдырмауды да Елбасы шешеді. Мысалы, орынбасары 10 жылға сотталған Ауыл шаруашылығы министрі Асылжан Мамытбеков еш ойланбастан отставкаға арыз жазса болады. Бірақ, мемлекеттік қызметкерлердің ішкі тәртібіне шенеуніктердің барлығы бірдей бағына бермейді екен. Жуырда ғана Астанаға келіп, есеп беріп кеткен Атырау облысының әкімі: «қарамағымдағылар үшін жауап бермеймін, әркім қолымен істегенді мойнымен көтерсін» деген болатын. Сондықтан, депутаттар аймақтардағы әкімдерге де шара қолдануды ұсынды. Жемқорлыққа қарсы агенттіктің төрағасының айтуынша, бұған қатысты келесі жылы арнайы заң жазылмақ.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
