Петропавлда қаңғыбастар полицейлерге ән шырқап өлең оқып берді
Петропавлда үйсіздерді құтқару шарасы жүріп жатыр. Суық түскелі бері олардың жағдайы жергілікті полицейлерді алаңдатса керек, күніне 20-30-дан астам қаңғыбас уақытша паналау орталығына жеткізілуде. Себебі, үй-күйсіз қаңғып жүргендердің барар жер, басар тауы жоқ. Ал, қыс болса, қыр астында. Бірақ мұндай қайырымдылықтан бас тартқан қаңғыбастар бейімдеу орталығынан жаппай қашып жатыр.
Автор: Досжан Маратұлы
24.10.2014
Жергілікті полицейлер осылайша қаңғыбастарға мейірім танытып, уақытша паналау орталығына жеткізуде.Ал баспанасы болмаса да, көше кезген үйсіздердің көңілдері көтеріңкі. Бірі өлең оқып, бірі тіпті, ән де шырқап жіберді.
Петропавл қаласында дәл осылай далада қалғандар жетерлік. Күніне 30-дан астам қаңғыбас бейімдеу орталығына әкелінуде. Бірақ полицейлер алғашқыда олардың аты-жөндері мен қылмысқа қатысы бар-жоғын анықтап, саусақ іздерін алады.
Үйсіздер үшін бұл үйреншікті жағдай.Құдықтың ішінде, не жылу құбырының үстінде отырып, іштері пысса керек, өздері сынды көпті көріп қуанып қалды.
Бұл 45 жастағы Александр есімді қанғыбас. Бұрын теміржолшы болып қызмет еткен. Әйелімен ажырасқан соң араққа салынып, пәтерінен айырылған. Енді осылай көше кезіп, әркімнен нан сұрағалы 7 жылдың жүзі болыпты.
Александр Сынков:
-Немен қоректенеміз дейсіз бе?Не болса соны жейміз. Осындай бейімдеу орталықтарына рахмет. Бұрын «Қызыл крест» ұйымы көмек көрсетіп тұратын, соңғы кездері келмей кетті. Бірақ қайырымды жандар қол ұшын созып тұрады.
Александр арақты қойып, қалыпты өмірге қайтып келмек ниетте. Тіпті полицейлер оның құжатын қайта жасап беруге уәдесін беріпті. Әзірге ол, осы орталықты паналамақ. Бірақ үйсіздердің басым көпшілігі қайырымдылықты қажет қылмады. Себебі, ауа температурасы әзірге 5 градус суықты ғана көрсетіп тұр. Сондықтан еркін жүріп, арақтан әлі біраз сілтеп алмақшы. Ал қыс қаһарына мінсе, қаптаған қаңғыбастың осы орталыққа қайтып оралары сөзсіз.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
