Астанада жүгенсіз жүргізушілер ноу-хау құрылғымен жазалана бастады
Астана полициясы жүгенсіз жүргізушілерді ноу-хау құрылғы арқылы жазалауға кірісті. Оның нәтижесі тәртіп сақшыларын таңғалдырып отыр. Өйткені бюджетке түсетін кіріс көбейген. Мұның барлығы Елордадағы көлік көп жүретін 10 қиылысқа бір мезетте суретке және бейне таспаға түсіретін камералар орнатудың жемісі.
Автор: Жәудір Оразхан
27.10.2014
Нұржан Әділов, Астана қалалық ІІД Әкімшілік полиция басқармасының бөлім бастығы:
-Бұл технология бізде жылдамдық тәртібін жоғарылату және бағдаршамның рұқсат етілмейтін шамына жүру және тоқтау сызығын кесіп өту сияқты бұзушылықтарды бірден автоматты түрде белгілеп алады.
Әмбебап құрылғыны бас шаһардағы үлкен даңғылдардың қиылысынан кездестіруге болады. Төрткөзді камералар жүйіткіп келе жатқан көліктің қозғалысын жіті бақылай алады. Егер темір тұлпар ереже бұзса, оның мемлекеттік нөмерін алыстан-ақ анық суретке және бейнебақылауға түсіреді. Тағы бір ерекшелігі, бұл камералар ауа-райын таңдамайды: қақаған қыс пен жауынды күнде, тіпті түнде де міндетін бұлжытпай орындайды екен. Ал, таспаға түсіп қалған машина туралы мәлімет алдымен ақпараттық орталыққа жетеді де, кейін жүргізушінің үйіне жөнелтіледі. Сөйтіп, көлік иесі әр шалыс басқаны үшін айыппұл арқалайды. Мысалы, бағдаршамның қызыл түсіне жүріп кетсе, 9 мың теңге төлеуі тиіс. Осылайша, жаңа жүйенің қала қазынасы үшін пайдасы шаш етектен. Небары бір аптаның ішінде айыппұлдан бюджетке 7 миллион теңге түскен.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
