Астанада Шекара қызметінің директоры қамауға алынды
Басынан дау арылмаған Шекарада кезекті жемқорлық. Бұл жолы қатардағы қызметкердің емес, Шекара қызметінің директоры Нұрлан Жоламановтың қолына кісен салынды. Бір қызығы генералды өзінің әріптестері тұтқындап отыр. 58 жастағы шенді Ұлттық қауіпсіздік комитетінің қолына түскен. Комитет атышулы істің мән-жайын ашып айтпай отыр. Тек Жоламановқа қатысты «қызмет бабын пайдаланды» деген бап бойынша қылмыстық іс қозғалғанын хабарлады.
Автор: Ербол Сейілхан
27.10.2014
-Шекара қызметінің директоры Нұрлан Жоламановтың не бүлдіргені әзірше белгісіз. Тек Ұлттық қауіпсіздік комитетінің арнайы операциясы кезінде, «қызмет бабын асыра пайдаланды» деген күдікпен қамауға алынған.
Қазір бас штабы Астанада орналасқан Шекара қызметінде үлкен дүрбелең. Ұлттық қауіпсіздік комитетінің арнайы тергеу тобы, Жоламановтың кабинетін мөрлеп тиісті қаржылық құжаттарды шұғыл тексеріп жатыр. Генералдың бірнеше орынбасарына да қатысты тергеу амалдары жүргізілуде екен. Осыған қарағанда, тағы бірнеше адамның тұтқындалуы ғажап емес.
Енді Нұрлан Жоламанов кім еді дегенге келсек. Генерал –лейтенант шекараға дейін әскерде басшылық қызметтер атқарды. Тіпті Қорғаныс министрінің орынбасары да болған. 2012 жылы Алматы облысында Владислав Челах 14 қызметтесін қырып салған соң, оған дейінгі басшылық құрам отставкаға жіберілген болатын. Жоламановтың өзі 2012 жылдың желтоқсанында, Шымкент түбіндегі әуе апатынан қаза болған Тұрғанбек Стамбековтың орнына жайғасқан-ды. Алайда, Шекара қызметін 2 жылдай басқарып, міне, соңында істі болып жатыр.Жемқорлықпен аты шыққан, ішкі тәртібі босаңсыған саланы ретке келтіруге жіберілген Жоламановтың алғашында іске бел шеше кіріскені жасырын емес.
Нұрлан Жоламанов, ҚР Ұлттық қауіпсіздік комитеті Шекара қызметінің директоры: (11 желтоқсан, 2013)
- Жауынгерлік ту әскери бөлімдердің символы. Ол сарбаздардың ар ұяты. Сондықтан сарбаздар оны көзінің қарашығындай сақтап, сертіне берік болып, Отаны алдындағы қасиетті борышын өтеуі тиіс.
Қасиетті борыш туралы жиі айтатын генерал еліміздегі барлық шекара бекеттерін аралап шықты. Тіпті жаңадан шекара бекеттерін тұрғызуға бюджеттен миллиардттап қаржы бөлінген болатын. Кейбір болжамдарға қарағанда, Жоламановтың тұтқындалуы осы ақшаның игерілуіне қатысты болса керек.
-Десе де, бұл ақпаратты Ұлттық Қауіпсіздік комитеті растаған да жоққа шығарған жоқ. Барлық мәліметті құпия ұстауда. Ал Нұрлан Жоламанов Шекара қызметінің директорымен қоса, Ұлттық қауіпсіздік комитеті төрағасы Нұртай Әбіқаевтың орынбасары екенін де айта кетейік. Бірақ шен мен шекпенге қарамаған комитет өз қатарын жемқорлардан тазартуға қайта кіріскен секілді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
