Бензин тапшылығынан жүргізушілер жаппай газға ауысып жатыр
Ал, елімізде осылай жанармай тапшы болып жатқанда, көлікке газ баллонын орнату орталықтарында жұмыс қыза түскен. Себебі, бензин бағасының шарықтағаны былай тұрсын, оны іздеп сенделген жүргізушілер үшін газға көшу анағұрлым тиімді болып отыр. Сондықтан көлік иелері біртіңдеп газ баллондарын орнатып, көгілдір отынға көшкен. Десе де, оңтүстік астанада газ құю бекеттері де тым аз.
Автор: Досжан Маратұлы
28.10.2014
-«Бензин жоқ.Тек талон арқылы беріледі» Бұл сөздер көлік тізгініндегі әрбір жүргізушіге таныс болар. Жағар жанармайдың мұндай тапшылығына, бензин бағасының шарықтауын қосыңыз. Сол себепті тығырыққа тірелген жүргізушілер біртіңдеп газға көшуде.
Осындай жүргізушінің бірі – Санжар Сәтенов. Жарты жыл бұрын көлігіне метан газының баллонын орнатыпты. Ол үшін 3 мың доллардан аса қаржы шығындаған. Бірақ, газ бағасы арзан болғандықтан, «шығынның жартысын өтеп алдым»-дейді, ол.
Санжар Сәтенов, Алматы қаласының тұрғыны:
-Бензин бағасы қымбаттаған соң, газға көштім.Әйтеуір газ әзірге қол жетімді ғой.Оның үстіне көлік қозғалтқышының көлемі үлкен болған соң бұл өте тиімді.Тек, жүк салатын орынды алып тұр демесеңіз, қалғанының барлығы жақсы.
Алайда, темір тұлпарды бензиннен газға ауыстыру да қомақты қаржыны талап етеді.Орта есеппен400 мың теңгедей қажет.Бірақ жүргізушілер уақыт өте келе шығынды ақтап аларына сенімді. Ал, газ баллонын орнататын мамандар газға көшу еш қауіпсіз деп отыр.
Берік Габдулахидов, Газ баллонын орнату орталығының маманы:
-Біз көлікке орнататын баллондарды тексеріп көрдік. Ең мықтысы осы метан баллоны. Өте қалың. Көлік соқтығысқан кезде бұл жарылмайды. Таза темірден дайындалған.
Ал, мұнай газ саласындағы тәуелсіз сарапшылар жүргізушілердің бұлайша тығырықтан шығуын құп көрмейді. Себебі, отандық көліктерді газға көшіру үшін ең алдымен оларға жағдай жасалу керек.Ал, ертең бәрібір көліктің басым бөлігі газға көшкен күннің өзінде көгілдір отын бағасының да шарықтап шығы келетініне сенімді.
Сергей Смирнов, тәуелсіз сарапшы:
-Біздің елде газбен жүретін көліктер үшін инфрақұрылым дамымаған. Газ құю бекеттері жеткіліксіз. Алматыда тек 6-ау ғана бар.Оның үстіне газбен жүретін көліктер үшін қызмет қылатын орталықтар да жоқтың қасы. Тіпті, көліктердің басым бөлігі газбен жүретін Маңғыстау облысында газ жетіспеушілігі байқалып жатыр.
Көгілдір отынмен қозғалатын көліктердің санын арттыру мәселесін депутаттар да көтерген еді. Бірақ бұл үкіметке тек ұсыныс ретінде айтылғанымен, нақты бір шара қолға алынған жоқ. Сондықтан жүргізушілер бензин тапшылығынан қашып, көліктеріне өз еркімен газ баллондарын орнатуда.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
