Алматыда жүргізушілер бензин таппай көше кезіп кетті
Бензин құны қайта көтерілуі мүмкін. Мамандар жаңа жыл қарсаңында халық көп тұтынатын АИ-92-нің бағасы өзгереді деген болжам жасап отыр. Ал тапшылықтың әлі бітер түрі көрінбейді. Өңірлерді айтпағанның өзінде, Алматыда да жұрт жанармай таппай сабылып түр. Соңғы 4-5 күннен бері тіпті АИ-92 түгілі, 80 маркалы бензин де қат. Еркін сатылып жатқан бірді-екілі бекеттерде болса шеті жоқ кезек. Жыры бітпеген жанармай жайында Олжас Байжан толығырақ.
Автор: Олжас Байжан
28.10.2014
Қазан айынан бастап жанармай тапшылығы жойылып, жұрт қалаған жерінен қажетті көлемде құя алады деген шенділердің уәдесі орындалған жоқ. Қазан түгілі қараша келді, ал бекеттерді әлі сол ұзын-сонар кезек, АИ-92 бензинін таба алмай сабылған жұрт. Көлігі ең көп Алматыда соңғы бес күндегі көрініс осындай. Жанармайын сарқыған жүргізушілер машинасын бекетке тіпті итеріп әкелуге мәжбүр.
-Қай жерге барсаң да осындай кезек. Үшінші бекетке келдім, күтеміз. Көреміз енді не боларын. Басқа не істейсің?
-Қаланың ішінде кішкене бар, ал сыртында мүлдем жоқ.
Мамандар тамыз айындағы бензиннің қымбаттауы тапшылықты жоя алмады, сондықтан ең өтімді АИ-92 төңірегіндегі жыр әлі де жалғасады деп отыр. Себебі отандық зауыттар ішкі қажеттілікті қамтамасыз ете алмаса, ресейлік өнімді саудалау кәсіпкерлер үшін тиімсіз. Ал тығырықтан шығудың жалғыз жолы бағаны қайта қарау деген пікірде.
Олег Егоров, ҚР БҒМ Экономика институтының жетекші маманы:
-Биыл тағы да жанармай құны өседі. Желтоқсанға қарсы баға саясаты өзгеріске ұшырауы мүмкін. Себебі бізге үнемі Ресейдегі бағаны айтып жатыр. Ақырындап сөзден әрекетке көшіп, солтүстік көршімізбен теңесуге аз уақыт қалды.
Мамандар сондай-ақ отандық үш мұнай өңдеу зауыттарының күрделі жөндеуге жабылуы көзбояушылық деп отыр.
Айдар Әлібаев, Қаржы қызметтерін тұтыну одағының төрағасы:
-Мұнайы көп елде үнемі жанармай тапшы болса, бұл басқару саясатының тиімсіздігі. Жыл сайын жолды өтірік жөндегеннен гөрі, бір рет қомақты қаржы жұмсап 20-30 жылға жететіндей тас жол төсеуге болады. Тура сондай жағдай мұнай зауыттарында қалыптасқан. Жаңартуды сылтау еткендер, өз қалтасын қалыңдатумен айналысуда.
-Энергетика министрлігі жуырда ғана Ресей, Белорусь, Әзірбайжан мен Қытайдан тонналап бензин алып, тапшылық жойылады деп уәде еткен. Бірақ қазір жағдай ушықпаса, шешімін таба қоймады. Дегенмен шенеуніктер әзір бағаның өзгермейтінін айтып, жұртты сендіруге тырысуда. Ал жылына 3 миллион тонна ішкі сұранысты отандық зауыттардың қамтамасыз етуі үшін де әлі бірнеше жыл қажет екен.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
