Семейдегі бұл жатақханаға кіріп, тас қараңғы дәлізді көріп, мұнда біреу тұрады деп айту қиын. Десе де, бұл ғимаратты 170 отбасы пана етіп отыр. Жылдар бойы жөндеу көрмегендіктен төбесі әбден тозып кетіпті.Төбеден аққан судан қабырғалар сыз тартып, көк басқан. Қолқаны қабар иіс те пайда болыпты. Тіпті кей тұрғындардан қауіпті дерт анықталған.

Надежда Фрес, Семей қаласының тұрғыны:

-Ауаның өте ылғалды болуының әсерінен жөтеле бастадық. Өкпе ауруына шалдығып қалдық па деп қорқамыз. Өйткені төменгі қабаттағы тұрғындардың бірінен туберкулез таяқшасы табылған.

Жоғары қабатта тұратын адамдар төмендегі көршілермен арпалысып жалықтық дейді. Себебі, шатыр жөндеуге қажетті қаражатты жинамақ болғанда бізге қатысы жоқ деп, ат тондарын ала қашқан. Енді өзара дауласып жүргенде төбе мүлдем опырылып түсе ме деген үрейде.

Екатерина Возженикова, Семей қаласының тұрғыны:

-Менің кішкентай балаларым бар. Бастарына мына үгітіліп жатқан төбе құласа не істеймін!? Ешкімге керек емес.

-5 қабатты жатақхана тұрғындары көшіп кетуге әзір. Алайда, мұндағы бөлмелердің құнына басқа баспана табу мүмкін емес. Амалы таусылған жұрт билік тарапынан көмек болса дейді.

Тұрғындар мемлекеттік модернизациялау бағдарламасына қатысуға ниетті. Тиісті құжаттарды жинап, тапсырып қойған. Алайда жөндеу жұмысы келесі жылы ғана басталуы мүмкін.

Мөлдір Нұрғалиева, Семей қалалық тұрғынүй коммуналдық шаруашылығы бөлімінің бас маманы:

-Тұрғындардан қажетті мөлшерде қол жиналды. Қазіргі уақытта сметалары жасалып, өздерінің мердігерлерін таңдады. 2015 жылға алдын ала қатысатын тұрғын үйлердің тізімі облысқа жіберілді. Сол тізімде ол үй де бар.

Жатақхана тұрғындары шатыр жөнделсе, оның ақысын қалай да өтейміз деп ант-су ішуде. Тіпті, төлемдерден жалтарып жүрген көршілерін де көндіруге бел байлаған. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!