-Осы инкубаторларда эмбриондар көбейеді. Әр тостақанда эмбриондардың саны, әйелдің аты-жөні жазылған.

Бұл кабинетті  – ЭКО клиниканың жүрегі десе болады. Өйткені, дәл осы бөлмеде жасанды жолмен ұрықтандырудың алғашқы сатысы басталады. Дәрігерлер жылдар бойы балалы бола алмай жүрген жұбайлардың эмбрионын арнайы аппараттарда баптап, бақылап, ананың жатырына салып береді.

-Бұл  эмбрионның  дамып жатқанына бүгін 5 тәулік.

Көбінемұнда түрлі ем-домннан еш нәтиже болмаған жандар келеді . Солардың бірі – Айгүл. 9 жылдан бері құрсақ көтере алмаған келіншек алдымен ел ішіндегі емшілерді аралаған. Түк шықпаған соң екі жыл бұрын жасанды ұрықтандыру жасату үшін мемлекеттік квотаға кезекке тұрыпты.

Айгүл, емделуші:

-Жергілікті жерлерден ем алдық, одан кейін Алматыда ем алдық. Осы Астанаға бірінші рет келіп тұрмын. Еміміз аяқталып қалды, алдағы демалыс күні функция салады.

Айгүлдің  қайта жолы болған. Екі жыл дегенде кезегі келіп, бағын сынап көрмек. Әйтпесе, құны 1 миллион теңге тұратын бұл қызметті ақылы алуға мүмкіндігі болмас еді. Ал, Астанада мұндай жасанды ұрықтандыруға қолы жетпей жүрген жүздеген жұп бар.

Элмира Ахметова,Ана мен бала  денсаулығын қорғау басқармасының басшысы:

-Биыл 600 жұпқа ақша бөлінді. Келесі жылы 750-ге, болашақта 2000 ға  арттырамыз деп жоспарлап отырмыз. Бұл «Саламатты Қазақстан» бағдарламасы бойынша жүзеге асырылады. Туған балалардың санына қарағанда, нәтижесі жаман емес. ЭКО жасауға  5 клиника қатысады. Оның үшеуі жеке меншік, екеуі мемлекеттік мекеме.

Көбіне квота тұрғыны көп Алматы мен Оңтүстік Қазақстанға бөлінеді екен. Ал, астаналық келіншектерге осы квотаның не бары 30-ы ғана бұйырады. Жыл сайын халық саны артып келе жатқан Елорда үшін бұл тым аз.

Алмагүл Ахметова, «Астана ЭКО лайф» клиникасының директоры:

-Меніңше, Үкімет осы мәселені көтеріп, қолға алса. Өйткені, қолдан ұрықтандыруды  ақылы жасатауға кез-келген адамның қолы жете бермейді. Кем дегенде Қазақстан үшін 3 мың квота бөлінсе, мәселені толық шешуге болар еді.

-Дәрігерлердің айтуынша, қазір елімізде 2 мың әйел қолдан ұрықтандыруға зәру. Бұл ресми тіркелгендері ғана. Ал, белсіз, бедеу екендерін жасырып жүргендер қаншама. Сондықтан ұрпақсыз қалып жатқан жанұяның саны бұдан әлде қайда көп. Жалпы, елімізде 9 мың бала жасанды ұрықтандыру арқылы дүниеге келіпті. Ең үлкені қазір 18 де екен.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!