Герольд Бельгер:

- Қазақтың тілі, жалпы, құдіретті тіл ғой. Керемет бай тіл. Соның байлығын астын сыза жүріп, барлығына түсіндіргім келеді. Орыстарға, немістерге түсіндіргім келеді.

Герольд Бельгер осыдан бірер жыл бұрын біздің арнадағы «Жүрекжарды» бағдарламасына осылай деп сұхбат берген еді. Айтылған әңгімесінің басым бөлігін қазақ тілінің жай-күйі төңірігенде өрбіткен. Өйткені, Гер-аға Гетемен ұлттас, Пушкинмен жерлес болғанымен, өзін тек Абайдың шәкірті санаған жан. Герольд Бельгер 1934 жылы Ресейдің Саратов облысында дүниеге келген. Тек 7-ге толғанда, Сталиннің жер аудару саясатымен Қазақстанға отбасымен жетіпті. Сөйтіп, қазақ ортасына түскен бала кейін нағыз қазақ атанды.

Герольд Бельгер:

- 1941 жылы соғыс басталған кезде Еділ бойындағы немістерді жаппай Қазақстанға көшірген. Соның арасында мен де келдім. Келген жеріміз қазақтың ауылы. Ленин атындағы. Ішінде бір орыс, бір неміс отбасы бар. Еділ бойынан Есіл бойына келдік. Еститінім қазақтің тілі, оқиғаным қазақ мектебі, ойнайтыным қазақтың балалары.

Әрине, ары қарай да білімін қазақша жалғастырған. Ал еңбек жолын Жамбыл облысында ұстаздықпен бастаған екен. Тек кейін қаламгерлігі жетелеп, Алматыға келген. Міне, дәл осы кезде Гете, Пушкин және Абайды бір-біріне жақындатып, тәжімалау ісімен айналысты. Сөйтіп, «Ауыл шетіндегі үй», «Даладағы шағалалар», «Алты асу», «Тасөткел», «Зоб», «Бауырластықтың белгісі» сынды төл туындыларын қосқанда 75 томдық еңбекті жазып шыққан.

Смағұл Елубай, жазушы:

- Ол кісінің өмірі, дәріптеп өткен тіл мәселесі Қазақстан тарихында өнеге болатын үлгі деп айтар едік. Яғни, қазақ тілін жақсы меңгерген Герольд қазақты дос санап өтті.

Дулат Исабеков, жазушы:

- Бельгер не үшін қымбат бізге?Өйткені ол қазақтың қамын қазақтан да артық ойлағаны үшін қымбат. Тек қана қазақты жақсы көремін деп жалған жалаулатып сөз сөйлеген адам емес.

Биыл күзде 81-ге толатын тұлғаның соңғы уақытта жүрегі сыр беріп келген. Ол соған қарамастан жазуын тоқтатқан жоқ. Ақыр аяғында, биыл 21 қаңтарда жүрегі ұстап, аурухананың жансақтау бөлімінен бір-ақ шықты. Гер-аға сол жатқаннан тұрмады.  Көпшілік біле бермейтін шығар, Герольд Бельгер қалың ойға батып, толғанған шағында Алматыдағы Шоқан Уәлиханов ескерткішінің жанына келіп отыратын әдеті болған. Міне, дәл мына орындықта. Енді бұл жер де жетімсіреп қалғандай.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!