Ақпан айы орта тұсына жеткенде Қарағандыда әдеттегідей қар емес, жаңбыр жауып, жұртты таң қалдырды. Көшелер суға толып, ал қаладан шығатын жолдар мұз айдынын елестетеді. Соның кесірінен жолдан тайған автобусты құтқарушылар сайдан әрең алып шығарды.

Серікбай Күбеев, көлік жүргізушісі:

-Қар, үсті мұз! Мұз болғасын тайғақ. Өте қауіпті! Өзі Құдай сақтасын жолаушылардың бәрін!

Ал мынау Семей-Өскемен тасжолы. Ол да көктайғаққа байланысты уақытша жабық.

Дмитрий Пронин, көлік жүргізушісі:

-Ауа-райы өте қолайсыз. Мәскеуден Өскеменге кетіп бара жатырмын. Тапсырушылардың берген уақытынан он күнге кешігіп барамын. Шығынға баттым. Себебі, жүкті күткендер біртіндеп бас тартып жатыр.

Тіпті осы көктайғаққа байланысты Семей мектептерінде сабақ та тоқталды. Ал мұзда жығылып, ауруханаға жеткізілгендер де жетерлік.

Құмар Сейілханов, травматолог:

-Бізге келгендердің жартысы қол-аяғын сындырған. Жұмысқа асығамын деп, ауруханадан бір-ақ шығады. Студенттер де, зейнеткерлер де көмек сұрап жатыр.

Қазір жаңбырдың арты ақ ұлпа қарға ұласты. Ал синоптиктер болса, ауа-райының құбылуы мұнымен шектелмейді деп отыр. Апта соңында қазіргі жылымықты  -20 градустық аяз ығыстырады деген болжам бар. Сондықтан мамандар алыс жолға шықпаған жөн деп кеңес беруде.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!