Буынып-түйініп отырған жұрт қоныс аударатын жерлерін алдын ала көріп келген. Барлығы да туған Калачиін қимайды. Белгісіз дерт қайта қозып кете ме деген қорқыныш қана оларды осы қадамға итермелеген.

Гүлжан Ахметова, Калачи ауылының тұрғыны:

-Ой, Калачида біз 25-26 жылдан бері  тұрамыз. Балалардың бәрі осында өсті. Қимаймыз. Жылайды, көбі жылап кетіп жатыр.

Калачиден көшпейміз деп табандап отырғандар да бар. Олар шенеуніктердің осы жұмысты ұйымдастырудағы немқұрайлығына өкпелі.

Басшыларға сенбегендіктен, үй-жайларын тастап, өре көшуге жүрексінеді.

Алексей Андреев, Калачи ауылының тұрғыны:

-Екі ауданға барып, ұсынған үйлерді қарап келдім. Жеке меншікке емес, уақытша тұруға дейді.Мынау көшіру науқаны аяқталған соң, ол үйден шық десе қайтем.Бала шағаммен далада қалам ғой. Сондықтан көшпеймін әзірге.

Ал дәл қазір 6 отбасы дүние-мүлкін арту үшін Қостанайдан жүк көліктерін күтіп отыр. Оларға көрші облыстың шаруа қожалықтары көмек қолын созыпты.

Дина Буслова, Калачи ауылының тұрғыны:

-Ертең Қостанай облысының Қарабатыр ауылына көшуге әзірленіп жатырмыз. Жұмыс, пәтер береміз деді. Ол жақта тіпті түйеқұс өсіреді екен. Бәрінен бұрын орманы бар. Біз үшін таза ауа қымбат қазір.

Соңғы күндері шыңылтыр аяздан ба ұйқы ауруы сәл саябырсыған. Ал шенеуніктер не баспана, не жұмыспен қамти алмаса да, тұрғындарды Калачидан кетуге үгіттеп бағуда.

Сәуле Ағынбаева, Есіл ауданы әкімінің орынбасары:

-Өткен жылы Наурыз туысымен адамдар жаппай ұйқыға кеткен. Күн жылынса, тағы қайталануы әбден мүмкін ғой. Қазір 80 отбасы көшуден бас тартып отыр. Олармен жұмыс жүргізіп жатырмыз.

Көптеген отбасылар басқа жаққа қоныс аударып жатқандықтан, Калачиде оқушылар саны да азайған. Бірақ жергілікті шенеуніктер соңғы шәкірт қалғанға дейін мектепті жаппаймыз деп сендірді. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!