-Жантүршігерлік оқиға  тура осы жерде болған. Жоғары жылдамдықпен жүйіткіген көлік, жаяу жүргінші жолағымен өтіп бара жатқан Нұргүл Тұрғынбаеваны келіп қаққан. Сол кезде 5 метрге бірақ ұшқан Нұргүл, бірден естен танып қалыпты.

Ал, мынау жақын маңдағы жанармай бекетінен түсірілген таспа. Онда ақ түсті көліктің келіншекті қаққаны анық көрінеді. Тек, тізгінде болған 2 азамат  жігіттікке жат әрекет жасады. Қызды «өлді» деп ойласа керек, ауруханаға апарудың орнына қоқысқа лақтырып кеткен. Өлім мен өмірдің ортасында жатқан Нұргүлді кейін полицейлер тауып алыпты.

Гүлсім Қарымбаева, Н.Тұрғынбаеваның туысы:

-Барсақ, Қаскеленнің ауруханасында жатыр екен. Реанимацияда, әлі өзіне келмеген. Басы ісіп кеткен. Беттің бәрі сырылған. Қаққан адам көлігін жақындата алмаған. Соған дейін дырылдатып тартып апарған ғой.

Нұргүл әлі ауруханада жатыр. Бірнеше күн ес-түссіз жатып, жақында ғана тілге келген. Айтуынша апат болатын күні қалаға тамақтануға бара жатыпты. Ал одан кейінгісі есінде жоқ.

-Апат туралы айтыңызшы қалай болды?

-Мен ештеңе білмеймін.

-Есіңізде ештеңе жоқ па?

-Жоқ, ештеңе жоқ.

Ауруханаға ауыр жағдайда жеткізілген 34 жастағы келіншекке үш ота жасалыпты.

Қуаныш Байкөбесов, травматолог:

-Ауыр бас жарақаты. Жамбас сүйегінің сынығы. Және асық жілігінің ашық түрдегі сынығы. Барлық оталар сәтті өтті. Ендігі кезекте уақыт пен күтім керек.

Қазір адам қағып, ізін суытқандарға қатысты 2 қылмыстық іс қозғалған. Тек, бір ай уақыт өтсе де кінәлілер ұстатпай жүр. Нұргүлді ақ түсті «Хонда Одиссей» қаққан. Осы апатты көрген білгендер болса, хабарлассын дейді полицейлер.

Дарын Арыстанбеков, Алматы облыстық ІІД баспасөз хатшысы:

-Тиісті сараптамалар тағайындалып отыр. Оқиғаның куәгерлері анықталып олармен сауалнама жұмыстары жүргізілуде. Оқиғаға кінәлі азаматты ұстау үшін барлық шара жасалып жатыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!