Мың жылдан астам тарихы бар Алматы шаһарының төл мерекесін тойлауға биыл ерекше көңіл бөлініп отыр. Өйткені, осыдан екі жыл бұрынғыға қарағанда, бұл жолғы мәдени шаралар саны екі есеге ұлғайған.

Мәркен Ахметов, Алматы қаласы Мәдениет басқармасы басшысының міндетін атқарушы:

-  Биыл өтетін шаралар саны рекордтық көрсеткішке жетіп отыр. Аудандар мен түрлі мекемелерде өтетін шараларды қоса есептегенде былтыр бес жүздей ғана болса, биыл бірнеше мыңға дейін артты.

Туған күннің дүркіреп өтуіне Алматыдағы 229 мәдениет ошағының барлығы да атсалыспақ. Сондай-ақ, қуанышты күннің шырайын кіргізу үшін, «Алматым жүрегімде» атты эстрадалық әндер байқауы өтпек. Жеңімпаз автокөлікке ие болады. Одан бөлек, Шәмші әндері, дәстүрлі әншілер мен домбырашылар да заманауи нақыштағы әуендер бойынша өнер байқауына түсетін болады.

Айнұр Бәженова, Алматы қаласы күнін ұйымдастырушы:

-  Бұл жерде де үш бағытта миллион теңгеден үш гран-при тағайындалып отыр. Және де «I love Almaty», бұл қалаға махаббатын, ниетін білдірген скульптуралық шығармалардан байқау ұйымдастырылады.

Биыл қала күні 20 қыркүйекке жоспарланған. Мереке туралы толығырақ білу үшін андройд және ios жүйелеріне арналған «Junaio» анықтама қызметі іске қосылған. Мұнда негізгі 50 мәдени шара туралы ақпараттар топтастырылған. Сонымен қатар, тұрғындар мерекеге қатысты ұсыныс-тілектерін қала әкімдігі сайтында немесе 355 0 777 телефоны арқылы білдіре алады. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!