Атақты Джеймс Бонд туралы кезекті кино экранға шықты
Ағылшынның атақты тыңшысы үлкен экранға қайта оралды! Джеймс Бонд туралы кезекті кинотуынды «007: Спектр» деп аталады. Триллер жанрында түсірілген фильмді алғашқылардың бірі болып Мәскеу жұрты тамашалағанымен, көркем туынды қазақ тілінде де сапалы дубляждалған. Ал оның тұсаукесеріне басты рөлді сомдаған бірқатар голливуд актерлер арнайы келді.
Автор: Нұргүл Нұрланқызы
02.11.2015
- Бұл мен Джеймс!
Джеймс Бонд туралы кезекті туынды шытырман оқиғаға толы. Трейлер жанрындағы фильмде тыңшы аса қауіпті лаңкестік ұйыммен күрес жүргізеді.
- Бұл ұйым қалай аталатынын білесің бе?
- Оның аты «Спектр»!
«007: Спектр» фильмінің режиссері – «Оскар» жүлдесінің иегері Сэм Мендес. Ал Бондтың рөлін төртінші рет Дэниел Крейг сомдаған. Картинаның Мәскеуде өткен көрсетіліміне голливудтың танымал актерлері Рэйф Файнс, Наоми Харрис және Дэйв Батиста арнайы келді. Олар да осы фильмде негізгі рөлдерді сомдайды.
Рэйф Файнс, актер:
-Фильмде негізгі рөлдің бірін сомдау мен үшін үлкен қуаныш. Кейіпкерімді бұған дейін Джуди Денч ойнаған. Ал Бернард Лидің ойнағанын бала кезімнен көріп өстім. Менің ойымша, әр актер рөлге өзіндік ерекшелік қосады.
Көрсетілімге келген актерлер киносүйер қауымның сұрақтарына жауап берді. Бұл фильмді түсіру жұмыстары 7 айдан астам уақытқа созылған екен. Ал бюджеті 250 миллион долларды құрапты. Актер Дэйф Батиста Бондтың басты қарсыласының көмекшісі болып ойнайды. Ол фильмдегі ең күрделі көріністерге түскен.
Дэйв Батиста, актер:
-Бондты өлтіру оңай емес. Ол бәріміздің де сүйікті кейіпкеріміз. Ол болмаса, фильм жалғасын таппас еді. Ал менің кейіпкерім Хинкс – Бондтың ең мықты қарсыласы.
Атақты тыңшы туралы фильмнің 24-ші бөлімі Қазақстанда 6-шы қарашадан бастап көрсетіледі. Ал, оны елімізге тарататын - «Дисней» және «Сони» студияларының ресми дистрибьюторы - «Меломан» компаниясы.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
