Суриковка тұрғындары үйлеріне әлі күнге дейін қара жер басып бара алмай жүр. Оларды құтқарушылар резеңке қайықтармен жеткізеді. Онда да тек су басқан үйлерінен жарамды заттары мен құжаттарын алу керек болса ғана. Бұл ауылдың тасқын астында қалғанына бір аптадан асса да, судың деңгейі түсер емес.

Виктор Шиллер, Қостанай облыстық ТЖД бастығының орынбасары:

-Жағдай күрделі. Оның үстіне жауын да толастар емес. Біз суды сорып алғанымызбен, қайта толып қалып жатыр. 

Суриковка 12-ші сәуірде топан судың астында қалған болатын. Арнасынан асқан 3 көлдің суы елді-мекенді тұтас басып, үйлердің шатырына дейін көтерілген. Баспанасыз қалған 55 адам жергілікті мектепке орналастырылды. Ал апаттың салдарын жоюға өңірдегі төтеншежағдай қызметінің барлық күші жұмылдырылды. Қуатты 7 сусорғыш құрылғы бес тәуліктен бері тоқтаусыз жұмыс істеп тұр. Алайда іс өнер емес.     

Қазірдің өзінде 150 мың текше метр су сорылып, екі бөгет орнатылған. Кентті құрғатуға нақты қанша уақыт кететінін құтқарушылар да айта алмайды. Бәрі ауа райына байланысты. Ал тасқыннан есеңгіреген жұрт жаңа қиындыққа тап болды. Олар енді өтемақы ала алмаймыз ба деп қорқып отыр.

Вера Тукманова, Суриковка кентінің тұрғыны:

-Үйлері өз атына рәсімделмегендерге ақша берілмейді дейді. Олай болса біз баспанасыз қаламыз. Қартайған шағымызда көше кезбелері атанатын болдық.

Суриковка тұрғындарының көбінің күйі қазір осындай. Қолдарында үйді сатып алғаны туралы әкімнің мөрі басылған қолхат болғанымен, өз аттарына рәсімделмеген. Бастапқы қожайындары әлдеқашан ауылдан көшіп кетіпті. Үйінің құжаты жоқтарды былай қойғанда барларының өзі өтемақы алатын-алмайтынынан бейхабар. Сондықтан тұрғындар мәселемізді шешіп береді деп кеше облыс әкімін күткен еді. Алайда ол ауылға ат басын бұрмады. Әкімдіктегілер өтемақы мәселесі туралы тілшілерге де сұхбат беруден бас тартып отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!