Қазір астаналық полицейлер ереже бұзған жүргізушілерге түбіртек жазып беріп қана қоймай, тура жол бойында айыппұл қабылдай да алады. Сақшының қолында сауда-саттық жасауға арналған терминалға ұқсас мынадай шағын әрі ыңғайлы құрылғы бар. Егер жүргізушінің банктік карточкасында ақша болса, айыппұлды дәл осы терминал арқылы бірден  төлей алады.

POS-терминалға  жүргізушілер де,  ерекше қызығушылық танытуда. Өйткені, көбінің айыппұл төлеу үшін банкке немесе халыққа қызмет көрсету орталықтарына барып, ұзақ кезек күтуден қашады.

Нұржан Әділов, Астана қалалық ІІД ӘПБ бастығы:

-Бір күннің ішінде үш операция болды. Жол ережесін бұзған адамдар төледі, банкоматтық карточка арқылы. Өздері айтып жатыр: ыңғайлы екен төлеуге, бізге жақсы екен, уақытымызды кетірмейміз, - деп.

Елімізде бұған дейін полицейлерде айыппұл қабылдайтын құрылғы болған емес. Сақшыларға заманауи POS-терминалды «ForteBank» ұсыныпты.

Шолпан Нұрумбетова, «ForteBank» басқармасы төрағасының орынбасары:

-Айыппұлды терминал не кассаға төлеудің еш айырмашылығы жоқ. Комиссия көлемі сол 1 жарым пайыз. Яғни, 5 мың теңге айыппұл төлесеңіз, 75 теңге комиссияға ұсталады.

Ал, терминал қабылдаған қаржы бірден орталық базаға түседі. Сондай-ақ, жүргізушілер осы құрылғы арқылы жиналып қалған ескі қарыздарын да төлеуіне болады.

Әзірге POS-терминал астаналық 30 полицейде ғана бар. Егер жүргізушілер жол бойында айыппұл төлеуге үлкен қызығушылық танытса, еліміздегі барлық сақшыға осындай құрылғы таратылмақ. Ал, айыппұлды бірден немесе 7 күннің ішінде төлегендерге 50 пайыздық жеңілдік жасалады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!