Таңғы 4 жарымда шыққан өрт шырт ұйқыдағы тұрғындарды осылай шошытты. Бірінші қабаттағы дәмханадан басталған жалын «Юбилейный» супермаркетіне тиіп, кейін 7 қабатты тұрғынүйді түгел шарпыған.

Елена Григорьянц, зардап шегуші:

– Түтіннің иісінен оянып кеттім. Алғашында кішкентай өрт шығар деп ойладым. Тек далаға шыққанда жалынды көріп, төбе шашым тік тұрды. Абдырап жүріп құжаттарымды да алмаппын.

Сөйтіп, күш алған жалын өрт сөндірушілер келгенше біраз жерді шарпып үлгерген. Жалпы көлемі 1100 шаршы метр жер күлге айналды. Құтқарушылар 140 адамды қауіпсіз жерге көшірген. Десе де зардап шеккен 7 адам бар. Үшеуі кішкентай бала. Ал 46 пәтердің күл-талқаны шыққан.

Баспанасыз қалғандарға сол жерде шатыр құрылып, қажетті көмек жасалды. Ал әбден шошып қалған тұрғындар төменгі қабаттағы дәмханалардан күндердің күнінде кесапат келетінін сезгендерін айтады.

Мұсабек Есболатов, зардап шегуші:

- Мына жердің тұрғындары: кафені құрту керек?» деп талай айтты. Шешім шықпаған. Енді соның кесірінен біз сияқты халықтар зардап шегіп жатыр.

Ал өрттің лезде күш алуына тұрғынүйдің сыртындағы тез жанатын материалдар да әсер еткен.

Сандуғаш Баймұхамбетова, Алматы қалалық ТЖД баспасөз хатшысы:
- Жеке тұрғын үйдің бірінші қабатынан алтыншы қабатына дейін балкондар қылтималары сайдингпен, тез жанатын материалдармен қапталған. Сондықтан   от тез таралған.

Баспаналары тып-типыл болған жұрттың жайын білуге Алматы әкімі де арнайы келген. Бауыржан Байбек өрттен кейінгі қирандыларды қалпына келтіру үшін жергілікті басшыларға 2 апта уақыт берді. Сондай-ақ осы оқиғадан кейін, тұрғынүй астындағы осындай дәмханалар түгел тексерілмек. Заңсыздық анықталса есіктеріне қара құлып салынады.

- Қазір оқиға орнында қалпына келтіру жұмыстары қызу жүргізіліп жатыр. Өрт шарпыған үйдің сыртына жөндеу басталған. Бұған қоса, жалыннан кейінгі қоқыстарды тазарту әлі де жүргізіліп жатыр. Жалпы саны 200-ге тарта қызметкер мұнда күні-түні жұмыс істеуде.

Бағалаушылар да осында жүр. Олар әр пәтер бойынша шығынды есептейді. Ал, оны «Корова бар» мен «Юбилейный» дүкенінің иесі төлеуі тиіс.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!