Риддерде шатырдан шыққан өрт ондаған отбасыны баспанасыз қалдырды

Таңсәріде тұтанған от бір тұрғынның өмірін жалмаған.  Қызыл жалын бірнеше отбасы паналаған барақ үйді небәрі бірер минутта түгел шарпыпты. Алаулаған от тіпті өрт сөндірушілерге бой бермей қойды. Жалын соңы жарылысқа ұласпас үшін олар тек үй ішінен газ баллондарын шығарып үлгерген. Түске таман бір-ақ бәсеңдеген өртте ұйықтап қалған тұрғындардың бірі тірідей жанып кетіпті. Төтенше жағдай қызметкерлері бұл оқиғаға шатырда біреулердің шырпы жаққаны себеп деп отыр.