Әнуар ақбозатқа жегіп жатқан ақ арба астаналықтарға жақсы таныс.  Соңғы кезде Елорда қонақтары мен тұрғындар онымен қала ішінде қыдыруды әдетке айналдырған. Тура  хан күймесіндей әдемі пәуескелердіжас ұста үйінің алдындағы мына қарапайым гаражда жасайды. Мұнда шеберге қажетті құрал-жабдықтың бәрі бар. Әнуар қазір кезекті арбаға арнап ағаштан ою оюда.

Әнуар Шаймергенов, Астана қаласының тұрғыны:

-Бұрын күймелерді  еуропалық стильде безендіретінмін. Соңғы кезде қазақы оюларды, ұлттық нақышта сәндеп беруімді жиі сұрайды. Бір күймені дайындау үшін екі ай уақыт кетеді. Болашақта үлкен цех ашсам деймін.

Арбаның сыртқы көрінісінен бөлек, ішінде де демалуға бар жағдай жасалған. Жайлы орындықтар, музыка. Айтқандай, Әнуар тек пәуескемен шектелмепті. Ол үйінде тұрған мына батырларды да қолдан жасап шыққан. Таза былғары, металлдан құралған жігіттерді бір айға жуық әзірлепті.

Әнуардың үйі тура шағын мұражайға ұқсайды. Сөрелерде тұрған түрлі ертегі  кейіпкерлері, көне қару-жарақ, қара былғарыдан жасалған жәндік іспеттес сөмкелер де ұстаның төл еңбегі. 

Әзірге шебердің жалғыз көмекшісі бар. Ол – анасы. Әнуарға қажетті ағаш, металл мен былғарыны Зияда апай жеткізіп отырады. 

Зияда Шаймергенова, Әнуардың анасы:

-Әнуар бала күнінен өзіне ойыншықтар жасап алатын. Кішкентайынан талантын таныдық. Мектепті бітірген соң, еш ойланбастан  суретші мамандығын  таңдады. Енді маған ағаштан хан тағындай диван жасап беремін деп уәде берді.

Сондай-ақ, Әнуар алдағы уақытта алтын күйме жасауды жоспарлап жүр. Егер қарапайым пәуескені екі айда әзірлесе, алтын арбаны құрастыруға кем дегенде жарты жыл керек екен.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!