Бұл тұрғындар үйде есік-терезелерін қымтап, ал далаға шықса ауыз-мұрындарын тұмшалап жүруге мәжбүр. Бұған себеп – 1 айдан бері аумаққа жайылған жағымсыз иіс. Қазір бала-шаға далаға шығып ойнауды, ал үлкендер жағы кешкі серуенді ұмытыпты. Тіпті иіске шыдамағандары уақытша үйлерін тастап кетіп жатыр.

Талғат Жазылбеков, Алматы қаласының тұрғыны:

Сасық. Жел соқса шыдай алмайсың. Есікті жауып, қашып кетеміз. Бала-шағамызды аламыз да, әпкелеріміздің үйіне кетеміз.

Адам төзгісіз иіс бұрынғы кірпіш зауытынан таралады екен. Биік қақпамен қоршалған аумақ бүгінде нағыз қоқыс полигонына айналыпты. Жүк көліктері мұнда түнімен тұрмыстық қалдықтарды тонналап әкеліп, төгіп кететін көрінеді.Тіпті, онда шыбын-шіркей мен алып егеуқұйрықтар қаптаған. Қоқыс полигонының зардабын тартқан халық жергілікті әкімдіктен көмек сұраған. Тек жұртқа жақпай жатқан иісті мұнда келген әкім сезбей кетіпті.

-Әкім мен ол жерде болдым ешқандай иіс жоқ деп отыр.

Шыдамы таусылған халық бүгін мәселені шешуге келген осы жер телімі қожайынының өкілімен керісіп қалды. «Құрылыс материалы» акционерлік қоғамының вице-президенті болса, қоқыс алаңы пайда болған аумақтың жалға берілгенін мәлімдеді. Сол кезде бұлар ол жер қоқыс алаңына айналады деп мүлдем ойламапты.

Ерлан Шәкіртов, «Құрылыс материалы» акционерлік қоғамының вице-президенті:

-Аумақты жалға алғандар тасымал қызметімен айналысамыз деген. Бірақ оның орнына мұнда тұрмыстық қалдықтарды тасыпты. Мен өзім жол жүріп кетіп, мұны білмей қалдым. Қазір жалға алушыларды бұл жерден шығару туралы шешім қабылданды.

Осылайша жер иелері тұрғындарды жағымсыз иістен құтқаруға уәде етті. Яғни жұмаға дейін мұндағы қоқысқа толы полигонның көзін жоймақ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!