Семейде энергетиктердің кесірінен инкубаторға салынған жұмыртқалар шіріп кеткен
Семейдің іргесіндегі Ескі қорған ауылының тұрғындары электр қуатымен қамтитын компанияға наразы. Айтуларынша, компаниядағылар жоспарлы жөндеу жұмыстарын желеу етіп жарықты қалаған уақытта сөндіруді әдетке айналдырған. Соның кесірінен шағын кәсібі бар тұрғындар шығынға белшеден батып жатыр. Олардың бірінің инкубаторға салынған жұмыртқасы шіріп кетсе, екіншілерінің жылыжайлары қурай бастаған.
Автор: Ұлан Нұрахмет
09.06.2016
-Мына күрке тауықтың жұмыртқасына лық толған инкубаторға 38 градус жылу қажет. Бірақ, жарықтың жоқтығынан ол 31 градусқа төмендеп кеткен. Енді қожайын 200 мың теңге шығынға бататын болдым деп отыр.
Өйткені ол іске қосылған сәттен бастап жарықты үнемі талап етеді. Ал қожайын жұмыртқаны сақтап қалу үшін 5 сағаттан бері қолдан келгенін жасап баққан. Тіпті, амалдың жоқтығынан балапан баспаған күрке тауықтарды да зорлықпен жатқызып қойыпты. Ақыры барлығы шіріп кетті,- дейді. Енді, жылудың жоқтығынан ылғал тартқан қорадағы 1000 балапаны қырылып қала ма деп алаңдаулы.
Александр Титов, Ескі қорған ауылының тұрғыны:
-Не істерімді білмей тұрмын. Құстарға жылуды жоғары деңгейде беретін арнайы шам қажет. Сонымен қатар жем араластыратын сауыттар және су құятын барлық қондырғы электр қуатына тәуелді.
Ауыл ішіндегі тартылған электр бағаналары 26 жылдан бері жөндеу көрмеген екен. Тозығы жеткен сымдар жиі үзіліп жұрттың үш күн жарықсыз отырған кездері болыпты.
Серікхан Оспанов, Ескі қорған ауылының тұрғыны:
-Тоңазытқыштың барлығы жұмыс істемейді. Оның ішінде сүтіміз бар. Май- қатығымыз бар деген сияқты. Соның барлығы бүгін бүлініп жатыр. Дала да суғарылған жоқ. Барлығы жанып кетті. Күн ыстығы 40 градусқа барып тұр.
Бұл шағын ауылдағы 60- қа тарта шаңырақтың басым бөлігі тауық өсіреді немесе жылыжай ұстайды. Ал олардың шығынға батып жатқанына мамандар тұрғындардың өздерін кінәлады. Өйткені не мектебі, не емханасы жоқ 3-ші категорияға жататын елді мекенде шағын кәсіп ашуға болмайды екен. Ондай болған жағдайда, кәсіпкер ретінде энергетиктермен арнайы келісім-шарт жасаулары қажет.
Алтын Құнафин, «ШҚ АЭК» АҚ аудандық электр желісінің басшысы:
-Екінші немесе бірінші категорияға өту үшін олар келіп өтініш білдіру керек. Сол арқылы техқұжат әзірлейміз. Одан кейін ғана қосымша генератор деген бар, соны қосуға мүмкіндік алады.
Сондықтан, жарықты аса қажет ететін тұрғындарға техникалық құжатты қайта әзірлеуден басқа қайран жоқ. Энергетиктер одан тариф құны өзгермейді деп уәде беріп отыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
