Алматыда алапат өрттен кейін дәмханалар жаппай тексеріліп жатыр
Газ баллондары алапат өртке себепкер болуда. Алматыда бірінен соң бірі өртенген дәмханаларды тексерген төтеншеліктер осындай ұғарымға келді. Бірақ осы бағытта алдын алу жұмыстарын жүргізетін маман тапшы екен. Мәселен газ-техникалық инспекцияда қазір тек екі адам ғана бар.
Автор: Олжас Байжан
09.06.2016
Қаладағы «Дастархан», «Арагоста» және «Аспандияр» дәмханалары түгі қалмай өртеніп кеткен соң, мамандар алдын алу шараларын күшейтуге тырысып жатыр. Алдағы уақытта арнайы инспекцияның штаты ғана емес, құзыретіне де өзгеріс енгізу көзделуде. Бұған себеп те жоқ емес. Бірінші алапат өрттен соң басталған тексеріс жұмыстарының нәтижесінде қалада 146 кафе мен жазғы алаңдарда өрт қауіпсіздігі сақталмағаны анықталған. Әрі басым бөлігі заңсыз тұрғызылған. Кішігірім нысандар соңғы рет 2012 жылы тексерістен өткен. Олардың қазіргі жағдайы тек төтенше оқиға болған кезде немесе тұрғындардың шағымынан соң ғана белгілі болады.
Родриго Розенбергс, Алматы қалалық ТЖД бөлім бастығы:
-Бұл дәмханалар қауіптілігі шамалы нысандар санатына жатады. Оларды мемлекеттік органдар қадағаламайды. Тек арыз-шағым бойынша тексеруге болады. Орта және шағын бизнесті қолдау саясатына байланысты бұл нысандарды жоспарлы түрде тексеруге хақымыз жоқ.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
