Қарағандылық судья айтқанына көнбеген алқа билерді таратып жіберді
Қарағандыда сот процестерінің бірінде шешім шығаруға қатысқан алқа билер шу шығарды. Айтуларынша, отырыс басталғаннан-ақ судья оларға өз дегенін істетуге тырысқан. Ал алқа билер бірауыздан күдіктіні ақтап алған екен. Бірақ судья олар ішкі ережені бұзды деп 12 адамнан құралған топты таратып жіберіпті.
Автор: Саят Сабдалы
09.06.2016
Сотта 17 жастағы бозбала 14 жастағы қызды зорлады деген іс қаралған. Екеуі бір-біріне туыс екен. Қыздың жүкті болып қалғанын ата-анасы 7 ай өткенде білгенімен екі жақ мәмілеге келіп, жастарды қосуға бел байлапты. Бірақ қыздың ата-әжесі бұған қарсылық танытып, бозбаланың үстінен полицияға арызданған. Сот отырысында алқа билер істің мәнісіне терең үңілдік дейді.
Елена Иванова:
-Екеуі де кәмелет жасына толмаған. Жыныстық қатынасқа балалықпен барған. Зорлағаны дәлелденбеді. Егер ол зорланған болса, сол кезде-ақ айтылуы керек. Бірақ баланың аяғы ауыр екенін ата-анасы кейін байқаған.
Дегенмен, кеңесу бөлмесіне барған сайын судья күдіктінің кінәсі дәлелденгенін, оған міндетті түрде жаза қолдану керектігін баса айтады екен.
Ирина Обердерфер:
-Судья Қасымов бізге қысым жасаумен болды. Зорлағаны дәлелденбегеніне қарамастан, оны кінәлі деп табуымызды талап етті. Осылай жасасаңдар балаға екі-ақ жыл жаза кесем деп те алдады. Дегенмен біз барлығымыз бірауыздан оны ақтау туралы шешімімізді жария еттік.
Осыдан кейін судья бірден ішкі тәртіптің бұзылғанын мәлімдепті. Дегенмен бұған нақты не себеп болғанын өзі де, облыстық соттың баспасөз қызметі де ашып айтқан жоқ.
Бір қызығы дәл осы судья осыдан екі апта бұрын тағы бір іс бойынша алқа билерін осындай желеумен таратып жіберген. Онда алқа билер 2 адамды атып өлтірді деп айыпталған азаматты кінәлі деп тапқан екен. Бірақ сот отырысы жүрген екі ай зая кетті. Мына істе де енді жаңа алқа билерін іріктеу шілде айына дейін жалғасып, сот отырысы басынан қайта басталады.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
