Ақтөбеде террористер тығылған үйдің тұрғындары атыс кезінде қалай қашқандарын айтты
Ақтөбеде тағы атыс. Бұл жолы іздеуде жүрген күдіктілер қаланың қақ ортасында ойран салды. Күш құрылымдары қалаға кірер-шығар жолды жауып жүргенде, бір топ содыр тура орталықтағы көпқабатты үйлерде пәтер жалдап жатыпты. Қырағы көршілер іздеудегі Дмитрий Таңатаровты танып қалып, тәртіп сақшыларына хабарлаған. Арнайы жасақ сау етіп келген кезде лаңкестер берілуден бірден бас тартқан. Сондықтан бір сағат бойы келіссөз жүргізгендей уақыт созып, 5 қабатты үйдегі тұрғындар эвакуацияланыпты. 4 содырдың көзі сол жерде жойылған.
Автор: Жаңалық Ахаш
10.06.2016
Ақтөбеде түннен бері тыныштық жоқ. Қаланың бірнеше ауданы қоршауға алынып, көшелер жабылды. Әсіресе, шаһардың ескі бөлігінде еркін жүру мүмкін емес. Өйткені содырлармен қақтығыс осы жақта бірнеше сағат бойы жүрген.
Жалғас Нұрбаев, Ақтөбе қаласының тұрғыны:
-Түнде 11-де келді ғой осылардың барлығы. Таңғы алтыларда атысты. Сол алтыдан әлі атысып жатыр.
Бес қабатты бұл үйдің айналасынан БТР-ден бастап, мергендерді де, иісшіл иттерді де кездестіресің.
-Қаланың қақ ортасындағы Некрасов көшесіндегі 79 үйде содырлар пәтерлердің бірін жалға алған. Кешқұрым жақын маңдағы дүкеннен іздеуде жүрген содырлардың бірі азық-түлік пен шылым алуға барған. Дәл қазір атысып, мылтық үні естіліп жатыр.
Тамақ алуға келген содырдың бірі Дмитрий Таңатаровты дүкеншілер жазбай танып, бірден құзырлы органдарға хабар берген. Жедел жеткен арнайы жасаққа лаңкестер бірден берілген жоқ. Атыссыз мәселе шешілмейтін болған соң тәртіп сақшылары бір сағаттай келіссөзбен уақыт созып, бес қабатты үйдің тұрғындары түгел эвакуацияланыпты. Сөйтіп, сарбаздар пәтерге басып кірген.Кескілескен ұрысты көзімен көрген тұрғындар шошып отыр. Атыс аяқталса да үйлеріне қайтуға қорқады.
Қамажай Құрманғалиева, Ақтөбе қаласының тұрғыны:
- Аллах уакбар деп айқайлаған дауыстар естілді. «Беріліңдер, тиіспейміз» деген сөздерді естідік. Лаңкестер көнбей айғайласып жатты.
Алтыншаш, Ақтөбе қаласының тұрғыны:
-Баяғыда боевик киноларда көретін едік. Мынау енді масқара сұмдық қой. Әлі жүрегім ауырып жылап алдым автобус ішінде. Қорқынышты ғой. Аямау керек хайуандарды.
Пәтерге тығылған содырлар сөйтіп бірнеше сағат бойы берілмей, дәрмені біткенше оқ атумен болған. Ресми мәліметке қарағанда, 4 лаңкестің көзі жойылған. Оның біреуі ауыр жараланып, тірілей қолға түскенімен ауруханада көз жұмған Дмитрий Таңатаров. Ал қазір екі күдікті мен сыбайластары іздестірілуде. Түстен кейін тәртіп сақшылары Гришин көшесіндегі үйді де қоршауға алды. Бірақ онда не болғаны жайында ешкім тіс жармай отыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
