Бүгін қос палаталы парламент аяқ-асты біріккен отырысқа жиналды. Тақырыбы да соңғы уақытқа дейін айтылмаған. Алайда, Мәжіліске премьер-министр бір топ қосшыларымен кіріп келгенде, Мәсімовтың заң шығарушы органға жеке-жеке соқпай, бір рет есеп бергісі келетіні түсінікті болды. Жиі қолға түсе бермейтін премьерге депутаттар ә дегеннен сыртқы қарыздың көптігін бетіне басты. Оның үстіне бюджеттің жартығын жабу үшін халықаралық банктерден 1 триллионнан астам теңге қарыз алған.

Омархан Өксікбаев, Мәжіліс депутаты:

-40 миллиардтан асады доллармен есептеген кезде. Мұның бәрі мемлекетіміздің бюджетінен қайтарылатын қаражат. Сондықтан осыған шектеу қою керек. Өткен жылғы лимитті олар 454 миллиард теңгеге артық орындап жіберді.

Тәбеті ашылған Үкімет мұнымен шектелмей, биыл тағы қарызға батуда. Алты айдың ішінде сырттан 2 миллиард теңге несие алып үлгерген. Халық қалаулылары қарызға құныққан шенеуніктердің шұғыл тоқтауын  талап етті. Заң бойынша белгіленген лимиттің шегінен асып бара жатқанын Мәсімовтың өзі де мойындап отыр.

Кәрім Мәсімов, ҚР Премьер-министрі:

-Қазір сыртқы қарызымыз шынында да шектен шығып барады. Әсіресе, доллар өскелі жағдай қиындады. Сондықтан Ұлттық қорды, Біріңғай ұлттық зейнетақы қорындағы қаржыны тиімді пайдаланудың жолдарын қарастырып жатырмыз.

Үкімет осылайша қайта-қайта шетелден қарыз алып жүрсе де, мемлекеттік бағдарламаларға бөлінген 8 миллиард теңгені игере алмаған. Яғни, шотта бос жатыр. Салдарынан 64 әлеуметтік нысан: мектеп, аурухана мен көпқабатты тұрғын үй салынбай қалған. Қолда бар ақшаны ұқсата алмаған мекемелерді Ішкі істер, Денсаулық сақтау, Ұлттық экономика, Ауыл шаруашлығы министрліктері бастап тұр.

Бектас Бекназаров, Сенат депутаты:

-Миллиардтаған  халықтың қаражаты тиімсіз кетіп, талан-тараж болса, лауазымды адамдар тек тәртіптік, ары кетксе әкімшілік жауапқа тартылады. Бұл дұрыс па? Миллиардтап шетелден қарыз алғанша осы талан-тараж болған қаражаттарымызды кінәлі адамдардан өзіміз неге қайтарып алмаймыз?

Яғни, депутаттар бюджет қаржысы тиімді жұмсай алмағандарға қатысты қылмыстық іс қозғауды талап етіп отыр. Ол үшін қос палата заңға өзгеріс енгізуге де дайын.

-Мұны естіген Үкімет басшысы енді қазынаның әр тиынына мұқият болуға уәде берді. Ол үшін бюджет және салық кодексін қайта жазып жатыр екен. Жаңа құжатқа сай, бюджетті жоспарлау мен оны игерудің әдісі түбегейлі өзгереді. Мәсімовтің бұл сөзіне иланған депутаттар жеме-жемге келгенде былтырғы бюджетті бірауыздан бекітіп берді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!