Ернеуінен асқан Ертіс суы Кереку жұртының бау-бақшасын басып жатыр
Қазірдің өзінде Павлодарское ауылындағы 60 үйдің он шақтысының қысқы азығы су астында қалған. Мұндайды бұрын-соңды көрмеген тұрғындар енді өз қауіпсіздіктері үшін алаңдаулы. Ал құтқарушылар мұны бір апта бұрын Шүлбі су қоймасынан артық судың ағызыла бастағанымен байланыстыруда.
Автор: Әйгерім Шакаманова
30.06.2016
Татьяна Дзюина өзен бойында орналасқан үйінде 24 жылдан бері тұрып келеді. Бүгін бақшасындағы тобықтан келер суды көрген әйел қысқы азықтан түгел қағылдық дейді.
Татьяна Дзюина, Павлодарское ауылының тұрғыны:
– Бақшадағы өнім балаларымның қыс бойғы қорегі. Жақында ғана салған картоп түгел су астында қалды. Тағы көтерілсе қайтеміз?Өзіміздің де су астында қалатын түріміз бар.
Ертістің суы өзге оншақты үйдің де бау-бақшасын басып қалған. Көкөніс сатып күнін көрген тұрғындар енді не істерін білмей дал.
Оксана Хибеба, Павлодарское ауылының тұрғыны:
– Жылына жетпіс, кейде жүз қап картоп жинаймыз. Оның жартысын сатып, азық-түлік сатып алушы едік. Бір апта бұрын салған картобым түгел су астында қалды. Осылайша шығынға батып отырмыз.
Әкімдіктегілер бөгет салып, елді мекенді қоршаудың қажеті жоқ дейді. Өйткені ауылдың тарихында мұндай жағдай алғаш рет болып тұр.
Ирина Фогель, Павлодарское ауылының әкімі:
– Бұған дейін мұндай жағдай болған емес. Бірақ өзен суы көтеріледі деген ескертулер айтылған еді. Қазір бақшасын су басқан үйлерді санап, мәселені шешу жағын қарастыратын боламыз.
Ернеуінен асқан Ертіс суы қазір облыс орталығындағы жағажайды да басып қалған. Мамандар мұны бір апта бұрын Шүлбі су қоймасынан артық судың сыртқа ағызыла бастағанымен байланыстырады. Алдағы күндері су деңгейінің тағы 1 метрге көтерілетінін жеткізген құтқарушылар Ертіске түсуге болмайтыыан ескертті. Сондай-ақ, жұртқа өзен бойындағы мал-мүлікке бас-көз болуға кеңес беруде.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
